Үндсэн хуулийн цэцийн шийдвэрийн дагуу иргэд банкны зөвшөөрөлгүйгээр барьцаанд байгаа үл хөдлөх хөрөнгөө давхар барьцаалах, түрээслэх, зарах эрх нь нээгдэв. Үүнтэй холбоотойгоор, Монголын банкны холбоо хуралдаж ипотекийн зээлийг зогсоогоод байгаа. Тэгвэл өчигдрөөс барьцаалан зээлдүүлэхтэй холбоотой бүх төрлийн зээлийн үйлчилгээгээ арилжааны банкууд хаалаа. Нэгэнт банкуудын зээл олгохдоо түшиглэдэг хуулийн зарим хэсгийг нь хүчингүй болгосон тул зээлийн эрсдэл тооцож, зээлээ түр хугацаанд хаах нь зохицуулалт хийх нэг хэлбэр гэж эрх баригчид үзэж байна.

Тухайлбал, УИХ-ын дэд дарга Р.Гончигдорж “Энэ асуудал банк, иргэн хоёрын дундын асуудал болчихлоо. Зээлийг үргэлжүүлэхийн тулд шинээр хууль эрхзүйн орчин бий болгоход маш хүнд байх” гэсэн юм. Харин УИХ дахь АН-ын бүлгийн дэд дарга ч Ш.Түвдэндорж “Энэ долоо хоногтоо багтаан ипотекийн зээлийн төслийг хэрэгжүүлэх боломжтой болгох хуулийн төслийг өргөн барина” гэлээ.
Гэхдээ банкны зөвшөөрөлгүйгээр барьцаанд байгаа үл хөдлөх хөрөнгөө давхар барьцаалах, түрээслэх, зарах эрхийг иргэнд хэвээр үлдээж, хуулийн төсөл боловсруулахад хүндрэлтэй байгаа юм байна. Учир нь, энэ төсөл Үндсэн хуулийн цэцийн гаргасан шийдвэртэй уяалдаж, иргэний өмчлөх эрхийг хөндөөгүй байх ёстой. Энэ нь нөгөө талдаа банкны барьцааны шаардлага өндөрсөж, иргэд түүнийг нь давж чадахгүй байх нөхцөлд хүргэж магадгүй байгаа аж. Ямартай ч, Хуульзүйн байнгын хорооны дарга Д.Ганбатаар ахлуулсан ажлын хэсэг энэ долоо хоногтоо багтаан хуулийн төслийг УИХ-д өргөн барихаар ажиллаж байна.