УИХ-ын дарга З.Энхболдод Ерөнхийлөгчийн хүний эрх, хуулийн бодлогын зөвлөх Ч.Өнөрбаяр Улс төрийн намын тухай хуулийн шинэчилсэн найруулгын төслийг өргөн мэдүүлэв.

Хүчин төгөлдөр үйлчилж буй Улс төрийн намуудын тухай хуулийг 1990 онд баталж, 2005 онд Улс төрийн намын тухай хууль болгон шинэчлэн найруулсан. Дэвшилттэй зохицуулалтууд тусгасан боловч намын бүтэц, зохион байгуулалт, үйл ажиллагааны ил тод, нээлттэй байдал, гишүүдийн эрх, үүрэг, намын дотоод ардчиллын талаар хангалттай нарийвчлан зохицуулаагүй юм.

Иймээс Улс төрийн намын тухай хуулийн шинэчилсэн найруулгын төсөлд дээрх асуудлыг цогцоор нь шийдвэрлэхээр есөн бүлэг 53 зүйлтэйгээр боловсруулжээ. Уг хуулийн төсөл батлагдсанаар улс төрийн намыг улсын төсвөөс санхүүжүүлж буй одоогийн зохицуулалтыг өөрчилж зарим шинэ хэлбэр нэмэгдэж байгаа аж. Эрх зүйн орчныг нь сайжруулснаар Монголын улс төрийн намуудын төлөвшил шинэ шатанд гарч, парламентын ардчилал бэхжиж, улс төрийн хямралт байдал гарах магадлал буурах төдийгүй ардчилсан эрх зүйт төрийн төлөвшил сайжрах нөхцөл бүрдэнэ гэж үзсэн гэнэ. Иргэдийн эвлэлдэн нэгдэх эрхийн баталгааг хангаж, улс төрийн намууд хандивлагчаас хараат бус болж, бодлогын намууд болсноор үзэл санаа, мөрийн хөтөлбөрийг нь харгалзан, улс төрийн боловсрол, соёл, ухамсар дээшилнэ гэж хууль санаачлагч үзсэн байна.