УИХ дахь МАН-ын бүлгийн зөвлөх Б.Цогтгэрэл өнөөдөр Аудитын ерөнхий газрын гадаа сор залан, түймэр дэгдээж  дуулиан тарилаа.  Төрийн өмчит болон төрийн оролцоотой аж ахуйн нэгж, төсвийн байгууллагуудыг дансаа шилэн болгож, санхүүгийн тайлангаа олон нийтэд ил тод зарлахгүй байна хэмээн  нийслэлийн Аудитын газарт нэр бүхий 50 гаруй газрыг шалгах хүсэлт өгөөд байсан юм.

Гэтэл хүсэлт өгснөөс хойш 130 хоног өнгөрсөн ч энэ талаар дээрх аж ахуйн нэгжүүд ч, Нийслэлийн Аудитын газар арга хэмжээ авсангүй удаад байгаа тул ийнхүү сор залж анхааруулга өгч байгаа гэнэ.

МАН-ын гол заргачийн нэг Б.Цогтгэрэл  хүүхэлдэйн дээр Монгол Улсын ерөнхий аудитор А.Зангадын нэрийг бичиж, уг хүүхэлдэйгээ шатаан сор залжээ.

Тэрээр энэ тухайгаа “Эрдэнэт үйлдвэр, Улаанбаатар төмөр зам, Дарханы  төмөрлөгийн үйлдвэр, Монголросцветмет нэгтгэл гээд төрийн өмчит компаниуд, төрөөс санхүүждэг төсөвт байгууллагуудын санхүү, данс тооцоо олон нийтэд ил тод байх учиртай. Энэ мэт  50 гаруй газрын санхүүд аудит хийхийг хүссэн. Харамсалтай нь  130 хоногт ямар нэгэн хариу өгсөнгүй. Тиймээс Монгол төрийг цэвэр ариун болгох, хүнд суртлыг устгаж үгүй болгох зорилготойгоор сор заллаа” гэсэн байна.