Засгийн газрын “Сайдын цаг” уулзалтад Хүн амын хөгжил, нийгмийн хамгааллын сайд С.Эрдэнэ оролцлоо. Тэрээр Ирээдүйн тэтгэврийн нөөц сангийн тухай хууль, ипотекийн зээлийн хүүгийн талаар мэдээлэл хийлээ.

Ипотекийн зээлийн хөтөлбөрийг үргэлжлүүлэн хэрэгжүүлэхэд Ирээдүйн тэтгэврийн нөөц санг ашиглахаар Монголбанк болон арилжааны банкууд хамтын ажиллагааны гэрээнд өчигдөр гарын үсэг зурсан байна. Ингэснээр ипотекийн зээл төсвийн хөрөнгө оруулалтаар хийгдэж байсан бол одоо Нийгмийн даатгалын сан, Тэтгэврийн даатгалын сангийн хуримтлалын эх үүсвэр буюу даатгуулагчдын шимтгэлийн орлогоос бүрдсэн хуримтлалаас санхүүжихээр болж байна гэж ойлгож болох юм. Энэ сан зөвхөн ипотекийн зээлийн хөтөлбөрийг санхүүжүүлээд зогсохгүй цаашид үр ашигтай бусад томоохон хөтөлбөр, хөрөнгө оруулалтын эх үүсвэр болно гэж Засгийн газар үзэж байгаа юм байна.

Энэ талаар Хүн амын хөгжил, нийгмийн хамгааллын сайд С.Эрдэнэ “Хөрөнгө оруулалтууд хараахан орж ирээгүй, улсын гүйцэтгэл төсвийн гүйцэтгэл 100 хувь болоогүй тул найман хувийн зээлийг тав руу шилжүүлэх үе шатыг хоёр хэсэгт ангилах ёстой гэж шийдсэн. Эхний удаад алслагдсан дүүрэг, 21 аймагт баригдсан орон сууцны хөтөлбөрийг хамруулахаар тусгасан. Гэхдээ улсын төсвийн гүйцэтгэл 100 хувь гараад, Оюутолгойн хөрөнгө оруулалт орж ирээд, хөрөнгө оруулалтын бусад эх үүсвэр шийдэгдээд эхлэх юм бол төвийн дүүргүүдэд байрлаж байгаа орон сууцны зээлийг таван хувь руу шилжүүлнэ. Энэ ажлыг энэ ондоо багтааж шийдэх зорилт тавьсан байгаа” гэв.