ОХУ-ын Москва орчмын Гребневийн дунд сургуулийн дүрслэх урлагийн багш Дария П өөрийн “В контакт” хуудсаар тачаангуй зургаа нийтэлж түгээснийх нь төлөө сургуулийн нь захирал Екатерина Левина түүнийг ажлаас нь халсан байна.
“Үнэхээр хэлэх үг алга. Жинхэнэ шок. Би өмнөөс нь ичиж байна. Ямар арга хэмжээ авах юм бэ” гэж захирал багш хэлжээ.
Захирлын хэлснээр бол Дариягийн талаар өмнө нь сурагчид ч, эцэг эхчүүд ч ямар нэгэн гомдол гаргаж байгаагүй, тэр бусдын л нэг адил энгийн хувцаслаж, биеэ зөв авч явдаг нэгэн гэнэ.
-Энэ багш дээд сургуулийн төгсөх ангид сурдаг, манайд есдүгээр сараас эхлэн ажиллаж дүрслэх урлагийн хичээл зааж байгаа, цэцэрлэгт явдаг гурван настай хүүхэдтэй. Сургууль дээр тэр энгийн л даашинз, өмд өмссөн байдаг. Ерийн л нэг эелдэг, ажилсаг бүсгүй. Хүүхэд нь бага, байнга өвчин ороож  л байдаг юм гэж захирал ярьжээ.
Гэтэл 26 настай энэ багш өөрийн интернет хуудсандаа хэт тачаангуй, нүцгэн зургаа тавьсныг нэг сурагчийн нь ээж үзээд захиралд нь мэдэгдсэнээр энэ хэрэг мандсан байна. Улмаар бусад эцэг эхчүүд мэдэж хүүхэдтэй ажилладаг сурган хүмүүжүүлэгч хүн ингэж эх захгүй байгааг шүүмжилж сургуулийн захиргаанд хандан, интернетийн хэрэглээ ийм түгсэн учраас хэзээ нэгэн цагт сургуулийн хананд энэ зургийг өлгөчихсөн байвал яах юм гэснээс ийн ажлаас нь халахад хүрчээ.