Global Times сонинд бичсэнээр Шизяжуан хотын Телевиз, радио, кино урлаг хэвлэлийн удирдах газрын орлогч дарга Цзо Чуньхэ олон нийтийн сүлжээн дэх өөрийн аккуантдаа Мао Зэдун бол шулмас байсан, жил бүр арванхоёрдугаар сарын 26-нд тэмдэглэдэг түүний төрсөн өдрийн арга хэмжээ нь “манай гариг дээрх тахин шүтлэгийн том арга хэмжээ” гээд биччихсэн байна. Ингэж бичсэнийх нь төлөө түүнийг “сүлжээнд худал мэдээлэл түгээсэн, намын сахилга батыг ноцтой зөрчсөн” хэмээн буруутгаж захиргааны сануулах арга хэмжээ аван ажлаас нь халжээ. Сүлжээнд бичсэн мэдээллийг нь бас устгасан байна.

2015 онд удирдагч Мао Зэдуны нэртэй холбоотой бас нэг дуулиан дэгдэж байсан юм. Тэгэхэд ССТY  телевизийн 56 настай хөтлөгч Би Фузянь гэгч хувьсгалын дууг  Бээжингийн дуурийн маягаар дуулахдаа Хятадыг үндэслэгч Мао Зэдуныг бас таагүй үгээр гуйвуулан оруулсан 75 секундын бичлэгээ интернэтэд байршуулсан юм. Үүний дараа Фузянийг эфирт гарахыг нь хориглож, хатуу арга хэмжээ авахыг сануулж байсан. .