Эдийн засгийн цар хүрээг бүрэн хэмжээгээр тодорхойлох, үндэсний тооцооны хамралтыг нэмэгдүүлэх, бодлого боловсруулагч, шийдвэр гаргагчдыг шаардлагатай тоон мэдээллээр хангах, далд эдийн засгийн талаарх олон улсын түвшинд харьцуулах мэдээллийг бий болгох зорилгоор Үндэсний Статистикийн Хорооноос 5 жил тутамд далд эдийн засгийн судалгааг явуулж, тооцоо судалгаандаа хамруулдаг.

Далд эдийн засгийн нэг хэсэгт хууль бус үйлдвэрлэгчид буюу биеэ үнэлэх, мансууруулах бодис худалдах, үйлдвэрлэх, тээвэрлэх, хэрэглэх, барааг хууль бусаар хил давуулах, зөвшөөрөлгүй хуулбарлан борлуулах, мөрийтэй тоглоом зэрэг үйл ажиллагааг хамруулдаг.

Энэ онд ҮСХ-ноос хууль бус үйл ажиллагааны тооцооллыг хийж байгаа бөгөөд энэ хүрээнд мансууруулах бодис худалдах, тээвэрлэх, хэрэглэх үйл ажиллагааны талаар хэлэлцүүлгийг өчигдөр зохион байгуулав.

Уг хэлэлцүүлэгт, Улсын дээд шүүх, Улсын прокурорын ерөнхий газар, ЦЕГ-ын Хар Тамхитай Тэмцэх Газар, ГЕГ, МХЕГ болон Хууль сахиулахын их сургууль, Цагдаагийн сургууль зэрэг байгууллагын төлөөлөл, ҮСХ-ны удирдлага, ҮТШСГ-ын холбогдох мэргэжилтнүүд оролцсон юм.