МСНЭ-ээс Зөрчлийн хуулиар хариуцлага хүлээсэн болон шалгагдаж байгаа сэтгүүлчдээ өмгөөлж, тус хуулийг эсэргүүцэн мэдээлэл хийлээ. Тодруулбал, МСНЭ-ийн Ерөнхийлөгч Х.Мандахбаяр "МСНЭ-ээс нэгдсэн ажлын хэсэг байгуулагдаж, Зөрчлийн хуулин дээр зургаан сар ажиллалаа. Улмаар тус хуулийг өнөөдрийн амьдралд нийцсэн байдлаар өөрчлөх санал, шаардлагыг хоорондоо ярилцаж, холбогдох газруудад хандаж ажилласан.
Гол нь Зөрчлийн хуулийн 6.21 заалтыг хуулиас хасуулах санал, шаардлага гаргаж байгаа. Үүнд хэвлэл мэдээллийн 15 эвлэл, холбоо нэгдэж байна. Энэ заалтад "Хүний нэр төр, алдар хүнд, хуулийн этгээдийн ажил хэргийн нэр хүндийг гутаан доромжилсон худал мэдээллийг нийтэд дэлгэсэн, эсхүл мэдээллийн хэрэгсэл, нийтийн сүлжээгээр тараасан бол хүнийг хоёр мянган нэгжтэй тэнцэх хэмжээний төгрөгөөр, хуулийн этгээдийг хорин мянган нэгжтэй тэнцэх хэмжээний төгрөгөөр торгоно" гэж заасан. Тэгэхээр хувь сэтгүүлчийг 2 сая төгрөгөөр, хуулийн этгээдийг 20 сая төгрөгөөр торгоно гэсэн үг.
Мэдээж сэтгүүлчид хүн гүтгэж, худал мэдээлэл түгээж болохгүй. Мэргэжлийн ёсзүйгээ дээдэлж ажиллах ёстой. Тиймээс Зөрчлийн хуулийг заавал эргэж харж, энэ заалтаа хасах ёстой.
Жишээ дурдвал, Dorgio.mn-ийн сэтгүүлч А.Баярмаа Зөрчлийн хуулиар гаргасан. Мөн Хэвлэл мэдээллийн зөвлөлд сэтгүүлч Ёсзүйн зөрчил гаргасан уу гэсэн гомдол ирсэн. Хэвлэл мэдээллийн зөвлөл хянаж үзээд Ёсзүйн зөрчил гаргаагүй байна гэж үзэхэд цагдаа 2 саяар торгож байна.
Мөн олон жилийн өмнө сонин дээр гарсан материалыг үндэслэл буюу эх сурвалжаа болгоод сэтгүүлч шүүмж бичсэн байна. Гэтэл Цэрэнжаргал гэх сэтгүүлчийг мөн Зөрчлийн хуулиар торгосон. Ингэхдээ энэ сонин дээр гарсан материалыг үнэн худлыг хэн батлах вэ. Тухайн үед энэ сонин дээр гаргахдаа эх сурвалжаа болгосон дүрс бичлэг нь хаана байна гээд торгосон байгаа юм. Ийм жишээнүүд байна.
Гуравдугаарт, Архангай аймгийн сэтгүүлч тус аймгийн даргыг төсвийн мөнгөөр жилдээ олон удаа гадаад явж байна гэж шүүмж бичсэн. Гэтэл 13 явсаныг 15 орчим явсан гэж мэдээлсэн хэмээн Зөрчлийн хуулиар торгосон байна.
Энэ бол сэтгүүлчдийг үнэнийг мэдээлэх эрхийг боомилж байна. Албан тушаалтнуудын өөрсдийгөө хамгаалах хэрэгсэл болгож байна. Тэгээд хуулийн ажлын хэсгийнхэнтэй нь уулзахаар "За тэгвэл Эрүүгийн хуульд оруулъя" гэдэг. Энэ бол шоронд оруулна шүү гэж байгаагаас ялгаагүй" гэлээ.
