Нийслэлийн мэргэжлийн хяналтын газрын дарга Л.Эрдэнэчулуун гахайн мялзан өвчний талаар мэдээлэл хийв. Тэрээр “Азийн орнуудад Африкийн гахайн мялзан гэдэг өвчин дэгдээд байгаа. Азийн орнуудаас дэгдэж орж ирж байгаа энэ өвчин манайд импортоор орж ирсэн махан бүтээгдэхүүн дээр илэрсэн. Улаанбаатар хотод гахайн мах, өөх импортолдог 10 ААН бий. Тэдний нийлүүлдэг 74 цэгээс худалдааны байгууллагууд махаа авдаг. Энэ цэгүүдээс 100 дээж авахад 50 хувьд нь гахайн мялзан өвчин буюу мялзангийн ДНК илэрсэн. Болсон, болоогүй махнаас илэрсэн байгаа. Тиймээс 74 цэг дээр хориглолт, хязгаарлалт тавьж, лацадсан байгаа. Монгол Улсын хэмжээнд 31 мянган гахай тоологдсон. Үүний 17 мянга нь нийслэлд байдаг. 130 ААН-ийн голомтын цэгт хориглолт хийсэн. Хориглолт хийсэн гэдэг нь голомтын цэгээс гахайнуудыг нь нүүлгэхгүй, халдваргүйжүүлэлт хийх, хяналт тавьж ажиллана гэсэн үг. Нэгэнт импортоор орж ирсэн гахайн мах, өөхнөөс ДНК илэрсэн учир Улсын онцгой комиссоос импортын үйл ажиллагаанд тодорхой хугацаагаар хязгаарлалт хийх нь зүйтэй” гэв.
