Монгол Улсын Шадар сайд Ө.Энхтүвшингийн ажлын албан өрөөнд Улсын онцгой комисс хуралдав. Нийслэлд агаарын бохирдол үнэмлэхүй хэмжээнд  байгаагаас үүдэж, томуу, томуу төст өвчний дэгдэлт газар аваад байгаа. Улсын онцгой комиссын хуралдаанаар томуу, томуу төст өвчний дэгдэлтийн талаар Эрүүл мэндийн сайд Д.Сарангэрэл ярихдаа

“Томуу, томуу төст өвчний дэгдэлт нэгдүгээр сарын 3-наас эрчимжиж орон нутгаар алаг цоог байдлаар гараад байна. Одоогийн өвчлөлийн байдлыг харвал Цагаан сарын үеэр улсын хэмжээнд олон хүнийг хамарсан дэгдэлт гарах төлөвтэй байна.  Эмнэлгийн орны ачаалал нийслэлд нэлээн өндөр байгаа. Батлагдсан 900 гаруй орноос 50 гаруй хувиар хэтэрсэн байдалтай байна. Тиймээс ХУД-ийн нэгдсэн эмнэлэг, Цэргийн эмнэлэг дээр нэмэлтээр тасаг гаргахаар  ажиллаж байгаа” хэмээн мэдээллээ. Энэхүү асуудлыг хэлэлцэж, Монгол Улсын Шадар сайд, УОК-ын дарга Ө.Энхтүвшин дараахь үүрэг чиглэлийг өгсөн юм.

Томуу, томуу төст өвчний дэгдэлтийн үед 0-5 хүртэлх насны хүүхдээ асарсан хөдөлмөр эрхэлж байгаа эцэг, асран хамгаалагчид эмнэлгийн хуудас олгох асуудлыг шийдвэрлэх,

Хүүхдийн эмнэлгийн орны тоог 500-гаар нэмэгдүүлэх асуудлыг судалж шийдвэрлэх,

-Томуу, томуу төст өвчний амбулаторийн үзлэгийн хувиас шалтгаалж үзвэр үйлчилгээ, нийтийн цуглааныг хязгаарлах арга хэмжээг холбогдох байгууллагуудтай хамтран зохион байгуулах,

Дэлхийн эрүүл мэндийн байгууллагад захиалсан вирусийн эсрэг тамифлю эмийг яаралтай нийлүүлэх ажлыг зохион байгуулахыг үүрэг болгов.