“Эрдэнэс-Тавантолгой” ХК-ийн “Эв санааны нэгдэл” Үйлдвэрчний эвлэлийн дарга С.Эрдэнэ Уул уурхай, хүнд үйлдвэрийн сайд Д.Сумъяабазарт хандан цахим хуудсаараа дамжуулж нээлттэй мэдэгдэл хүргүүлжээ. Энэхүү мэдэгдэлдээ “Та манай компанийн дотоод асуудалд хэтэрхий гүнзгий нэвтрэн оржээ. Ажилчин албан хаагчдыг ямар ч утга учиргүйгээр хуулиар тогтоосон ажлын цагийг сунган 20.00 цаг хүртэл ажиллуулж байна. 10 сая тн нүүрс худалдах гэрээ биечлэн хийсэн байна. Өөрийн хамаарал бүхий “Эрин Монгол” ХХК-ийг сайдын эрх мэдлээ ашиглан “Ти Ти Жи Ви Со Си Өү” ХХК-иар халхавчлан бузар аргаар ажиллуулах болсноор манай уурхайчдын ажлын байрыг улайм цайм булааж байна” зэрэг сайдыг эрх мэдлээ ашигласан талаар мэдээллийг оруулж өгчээ. Мөн энэхүү мэдэгдлийнхээ хариуг энэ сарын 27-нд өгөхийг шаардсан байна.

Түүний мэдэгдлийг бүрэн эхээр нь хүргэж байна.

УУЛ УУРХАЙ, ХҮНД ҮЙЛДВЭРИЙН САЙД Д.СУМЪЯАБАЗАР ТАНАА
НЭЭЛТТЭЙ МЭДЭГДЭЛ
2019 оны 5 дугаар сарыг 22 өдөр

УИХ-ын гишүүн, Засгийн Газрын гишүүн Таны хариуцаж байгаа салбарын “Эрдэнэс Тавантолгой “ ХК-ийн ажилчид бид компанийхаа тулгамдсан асуудлуудын талаар санал солилцох хүсэлтээ танд удаа дараалан бичгээр тавьж өнөөдрийг хүртэл нэг ч хариу аваагүйгээ уурхайчид биднийг басамжлан доромжилсон хандлага, салбар хариуцах сайдын төвшинд ажиллах ёс зүй, боловсрол мэдлэг нимгэний илрэл гэж үзэх болсноо албан ёсоор мэдэгдэж байна. 

Та манай компанийн дотоод асуудалд хэтэрхий гүнзгий нэвтрэн оржээ. Ажилчин албан хаагчдыг ямар ч утга учиргүйгээр хуулиар тогтоосон ажлын цагийг сунган 20.00 цаг хүртэл ажиллуулж байна. 10 сая тн нүүрс худалдах гэрээ биечлэн хийсэн байна. Өөрийн хамаарал бүхий “Эрин Монгол” ХХК-ийг сайдын эрх мэдлээ ашиглан “Ти Ти Жи Ви Со Си Өү” ХХК-иар халхавчлан бузар аргаар ажиллуулах болсноор манай уурхайчдын ажлын байрыг улайм цайм булааж байна. БНХАУ-ын нэр бүхий компаниудаас 50 ширхэг хар толгойтой, ногоон чиргүүлтэй шланз машин бэлгэнд авч нүүрс тээвэрлэлтэнд оруулсан байна. Та “Оюу Толгой” компанийн далд уурхайн бэлтгэн нийлүүлэгчээр ажиллах болсноор “Дубайн гэрээ”-г цээжээрээ хамгаалж улс орны язгуур эрх ашгийг хохироож байна. “Дайчин тамсаг” ХХК-тай холбоотой болсон гэх мэт олон бусармаг үйлдэлүүдэд нэр холбогдсон Та манай ажилчдын айдас зэвүүцлийг төрүүлж бөгсийг чинь арчиж хошууг чинь долоосон заримыг нь баярлуулж байна. Сайдын нэр хүндтэй сэнтийгээс улс оронд ажлын байр нэмэгдүүлэх олон ажлууд бодлогоор хэрэгжүүлж болдгийг Та ойлгох төвшинд хүрээгүй бололтой. 

“Ти Ти Жи Ви Со Си Өү” ХХК-ний үйл ажиллагаанаас манай компани их хохирол хүлээсэн нь үнэн гэдгийг хөндлөнгийн байгууллагууд нотолж залруулах үүрэг чиглэлийг өгчихсөн байхад харин Та хувийн явцуу эрх ашгаа эрхэмлэн хамаарал бүхий компаниа оруулж нийгэмд нэртэй олон хүний нэрийг барьж барьцаалан ашиглаж байна. Сайд Та эдгээр үйл ажиллагаадаа нэн даруй дүгнэлт хийж, манай компанид ажиллаж байгаа хамтран оролцогчдынхоо гар хөлийг нэн даруй татахыг шаардаж байна. 

2019 оны 5 дугаар сарын 27 өдрийн дотор Нээлтэй мэдэгдлийн хариуг авчирч өгөхийг шаардаж байна. Цаашид бид компанийн болон ажилчдын хөдөлмөрлөх эрх ашиг, ажлын байраа хамгаалахын тулд бүх арга хэрэгсэлийг ашиглах болохоо үүгээр мэдэгдэж байна.

“ЭРДЭНЭС-ТАВАНТОЛГОЙ” ХК-ИЙН “ЭВ САНААНЫ НЭГДЭЛ” ҮЭ-ИЙН ДАРГА ЭРДЭНЭ.С” гэжээ.