"Эрдэнэт” үйлдвэрийн 49 хувийг ОХУ-ын талаас худалдан авах үйл ажиллагаа нь хууль зөрчсөн үндэслэлээр Худалдаа хөгжлийн банкны Төлөөлөн удирдах зөвлөлийн дарга Д.Эрдэнэбилэгийг өнгөрсөн сарын 28-нд 30 хоногийн хугацаатай баривчлах шийдвэрийг Сүхбаатар дүүргийн Эрүүгийн хэргийн анхан шатны шүүхийн ерөнхий шүүгч Ж.Болдбаатар гаргасан. Гэвч хоригдоод тав ч хоноогүй байхад түүний өмгөөлөгч биеийн байдал нь муудсан гэх мэдээллийг өгсөн. Тодруулбал, элэгний архаг хатууралтайгаас гадна цагаан бөөмний дутагдалтай учир дотуур цус алдах эрсдэлтэй хэмээгээд цагдан хорих таслан сэргийлэх арга хэмжээг өөрчлүүлэх хүсэлтээ гаргасан байдаг. Гэвч Д.Эрдэнэбилэгийн өмгөөлөгч нарын гаргасан хүсэлтийг шүүх хүлээн авахаас татгалзсан шийдвэр гаргасан байна. Өөрөөр хэлбэл, Д.Эрдэнэбилэгийг суллахгүй гэжээ.