Шадар сайд Ө.Энхтүвшин сайжруулсан түлштэй холбоотой гарч буй асуудлаар сэтгүүлчдэд мэдээлэл өглөө.

“Яг одоогийн байдлаар нас барсан хүний тоо 6 байгаа. Хэвлэлээр яваад байгаа тоонууд зөрөөд байна билээ. Урд шөнө 62 настай хүн бурхан болчихлоо. Тэгэхээр мэдээлэл өгч байгаа газрууд тоогоо жигдлэх хэрэгтэй байна.

Гурван лабораторын шинжилгээний хариу өчигдөр гарчихсан. Түлштэй холбоотой ямар нэгэн асуудал үгүй гэж гарсан. Гэхдээ бид шинжилгээний хариуг баталгаажуулах хэрэгтэй гэж үзээд ОХУ, БНСУ, БНХАУ- руу дээж явуулсан. Энэ улсуудаас ирэх шинжилгээний хариуг хүлээж байна. Түлштэй холбоотой байна уу гэдгийг эхлээд мухарлах хэрэгтэй байх.

Хоёрдугаарт түлштэй холбоогүй юм бол асуудал юундаа байгааг олж тогтоох хэрэгтэй байна. Тиймээс угаартсан айл бүр дээр очоод галлагаатай холбоотой байна уу, түлшинд асуудал байсан уу, зуух нь ямар байсан юм бэ гэдгийг тогтоо гэдэг үүрэг өгсөн. Мөн цардуулыг нь нарийвчлан судлуулахаар Химийн хүрээлэн рүү явууллаа.

Энгийн зууханд түлж болохгүй гэдэг Хотын даргын захирамж гарсан гэдэг мэдээлэл бий. Үүнтэй холбоотой мэдээллүүдийг тодорхой болгох шаардлага байгаа юм.

Хэрвээ үнэхээр ханан пийшинтэй айлд таарахгүй юм бол зогсоох хэрэгтэй.

Бид дутуу ажиллачихлаа. Уг нь бол судалгаануудыг хийсэн, туршсан, болж байна гэж үзсэн. Гэхдээ л дутуу ажилласан гэдгийг болж өнгөрч буй асуудлууд харуулж байна. Хэн нэгэн нь өөрийгөө зөвтгөж, хамгаалах хэрэггүй. Цаана нь хүний амь нас эрсдээд байгаа учраас асуудлыг бодитоор нь гаргаж тавих хэрэгтэй.  Амь насаа алдсан хүмүүсийн ар гэрийнхэнд шат шатандаа дэмжлэг үзүүлнэ” гэлээ.