МҮЭ-ийн холбооноос энэ сарын 04-ний өдөр Монол улсын Засгийн газар 2020 оны төсөвт Хөдөлмөр, нийгмийн зөвшлийн гурван талт хэлэлцээрийн зарим заалтад туссан асуудлыг оруулаагүйг эсэргүүцэх жагсаал цуглаан зохион байгуулахаар Сүхбаатар дүүргийн Засаг даргад мэдэгдэл хүргүүлсэн билээ. Энэхүү мэдэгдлийн хариуг СХД-ийн Засаг дарга ирүүлэхдээ тухай байршилд мөсөн хотхон, гацуур мод, гэрэл чимэглэлийн уралдаан зохион байгуулах тул бүртгэж авах боломжгүй гэжээ.
Мэдэгдлийн хувийг Нийслэлийн Засаг даргын Тамгын газарт хүргүүлсэн ба Засаг даргын захирамжаар уралдаан зохион байгуулах болсон, 2019 оны 11 дүгээр сараас 2020 оны 03 дугаар сарын 1-ний өдрүүдэд жагсаал цуглаан хийх мэдэгдлийг хүлээн авах боломжгүй гэсэн хариуг өчигдөр /2019.12.02/ МҮЭ-ийн холбоонд ирүүлсэн байна.

МҮЭ-ийн холбооноос Улаанбаатар хотын захирагч бөгөөд Нийслэлийн Засаг дарга С.Амарсайханд дээрх хариу ирүүлсэнтэй холбогдуулан тайлбар авахыг хүссэн байна. Учир нь дээрх хариуг үндэслэлгүй, иргэдийн Үндсэн хуулиар олгогдсон эрхэд халдсан, захиргааны зүгээс дарамт шахалт үзүүлсэн хууль бус үйл ажиллагаа гэж үзжээ.