Коронавируст “Ковид-19” цар тахлын үед эмнэлгийн тусламж үйлчилгээг сайжруулах үүднээс нийслэлийн дүүргүүдэд PCR шинжилгээ хийх молекул биологийн лаборатори байгуулж байгаа билээ.

Энэ хүрээнд Сүхбаатар, Чингэлтэй, Сонгинохайрхан дүүргийн Эрүүл мэндийн төвд PCR шинжилгээний лабораторийг ашиглалтад оруулаад байна.

Шинэ лабораторийн бэлэн байдал хангагдсан эсэх, халдвар хамгааллын дэглэмийг мөрдөх орчныг бүрдүүлсэн байдлыг шалгаж Эрүүл мэндийн сайд Т.Мөнхсайхан, Нийслэлийн Эрүүл мэндийн газрын дарга Л.Төмөрбаатар нар тус төвийн салбар Эмүжин эмнэлэгт ажиллалаа.

Тус лаборатори нь 24 цагийн хугацаанд 300-1200 хүнд PCR шинжилгээ хийх хүчин чадалтай бөгөөд дүүргийн иргэдийг цаг алдалгүй шинжилгээнд хамруулж, “Ковид-19” халдварыг тандах, илрүүлэх болсноор шаардлагатай тохиолдолд хариу арга хэмжээ авах, эмнэлгийн тусламж үйлчилгээг шуурхай үзүүлэх боломж бүрдэж байна.

Мөн коронавируст “Ковид-19” халдвараас гадна томуу, сүрьеэ, бэлгийн замаар дамжих халдвар, элэгний В, С вирус зэрэг бусад халдварт өвчний шинжилгээг хийх хүчин чадалтай учраас энэхүү лаборатори нь цаашид эмнэлгийн тусламж үйлчилгээнд нэн шаардлагатай болохыг тус Эрүүл мэндийн төвийн дарга З.Балдандугар хэлж байлаа.

Нийслэлийн төвийн зургаан дүүрэгт байгуулж буй тус лабораторийг ойрын хугацаанд Баянзүрх, Хан-Уул дүүрэгт, цаашид алслагдсан дүүрэг болох Налайх, Багануур дүүрэгт байгуулахаар төлөвлөн ажиллаж байна.

НИЙСЛЭЛИЙН ЭРҮҮЛ МЭНДИЙН ГАЗАР