Манай улс уул уурхайн салбарт дэлхийн хөрөнгө оруулагчдын анхаарлын төвд байгаа билээ. Тэгвэл энэ боломжоо ашиглаж хөрөнгө оруулалтын татах үүднээс
уул уурхай болон барилгын салбарын олон улсын үзэсгэлэнг  Буянт-Ухаа Спорт цогцолборт энэ сарын 5-7-нд зохион байгуулахаар болжээ. Эл үзэсгэлэнг Азийн хамгийн том үзэсгэлэн зохион байгуулагч Allworld Exhibitions групп Mining Mongolia 2012 болон Building & Construction Mongolia 2012 нэрийн дор явуулах нь. Allworld Exhibitions групп нь 40-өөд жилийн турш Ази, Ойрхи Дорнодын орнуудад, тэр дундаа Хонг Конг, Индонез, Малайз болон Вьетнамд нийтдээ 150 гаруй томоохон үзэсгэлэн зохион байгуулж ирсэн туршлагатай гэнэ.
Mining and Construction Mongolia 2012 олон улсын үзэсгэлэн нь Allworld Exhibitions группын Монгол Улсад зохион байгуулж буй анхны арга хэмжээ юм. Үүнтэй төстэй уул уурхай, барилга болон эрчим хүчний томоохон үзэсгэлэнг Хонг Конг, Малайз болон Вьетнамд зохион байгуулжээ.  Одоогийн байдлаар үзэсгэлэнд Австрали, Канад, Герман зэрэг 22 орны 190 компани, байгууллага оролцохоо мэдэгджээ.