Монголын эрдэс баялгийн салбарын хамгийн том, өргөн цар хүрээтэй хамтын ажиллагааны платформ “MINING WEEK & MINEPRO 2025” уул уурхайн чуулга уулзалт, үзэсгэлэн хоёр дах өдрөө үргэлжилж байна. Өнөөдөр (2025-9-12)хамтын чуулган асарт “Эрдэс баялгийн салбарын хөрөнгө оруулалт, олон улсын чиг хандлага” сэдвээр хэлэлцүүлэг хийлээ. Тус хэлэлцүүлгийг УИХ-ын гишүүн О.Цогтгэрэл нээж үг хэлсэн бол Уул уурхайн салбарын өнөөгийн чиг хандлага, цаашдын зорилтын талаар Монгол Улсын Тэргүүн шадар сайд бөгөөд Эдийн засаг хөгжлийн сайд Н.Учрал илтгэл танилцууллаа. 

Эдийн засгийн өсөлт 2025 оны эхний хагас жилд 5.6 хувиар өссөн. Гадаад валютын нөөц 5.7 тэрбум ам.долларт хүрсэн. Зах зээлд нүүрсний үнэ бууралттай байгаа ч Засгийн газраас “Эрдэнэс Тавантолгой” ХК-д томилсон Бүрэн эрхт төлөөлөгчийн баг салбар хоорондын уялдаа холбоог сайн хангаж, үр дүнтэй ажиллаж гадаа валютын нөөцийг нэмэгдүүлэхэд онцгой үүрэг гүйцэтгэж байгааг Монгол Улсын Тэргүүн шадар сайд Н.Учрал илтгэлийн үеэр онцлон тэмдэглэлээ. Цаашдаа уул уурхайн салбарыг ил тод болгох, биржийн борлуулалтыг дэмжих бодлого Засгийн газар баримтална гэдгийг онцлон хэллээ.