Цагдаагийнхан Завхан аймгийн Ургамал суманд гар аргаар алт олборлож, байгаль орчинд их хэмжээний хохирол учруулсан 1350 гаруй хүнийг тараажээ. ЦЕГ-ын дарга Б.Билэгтийн тушаалаар тус суманд гэмт хэрэг, зөрчлийг илрүүлэх, таслан зогсоох, урьдчилан сэргийлэх болон нийгмийн хэв журам сахиулах үүрэгтэй цагдаагийн хүрээ байгуулан ажиллаж байна. Ургамал суманд Монгол орны өнцөг булан бүрээс очсон буюу 18 аймгаас ирсэн иргэд хууль бусаар оршин сууж, зөвшөөрөлгүй алт олборлож байсныг ийнхүү таслан зогсоожээ. Гэтэл цагдаагийн байгууллагын үйл ажиллагааг эсэргүүцэж, хууль бус үйл ажиллагаагаа үргэлжлүүлсэн зарим иргэнд Эрүүгийн хуулийн 214 дүгээр зүйлд заасны дагуу “Хууль бусаар ашигт малтмал хайх, ашиглах, олборлох” гэсэн зүйл ангиар эрүүгийн хэрэг үүсгэсэн байна. Тэдний байгаль экологид учруулсан хохирлыг тогтоолгохоор холбогдох байгууллагаас шинжээч томилон, шалгалтын ажлыг үргэлжлүүлж байгаа гэнэ. “Нинжа” нар 20х30 км газар сүйтгэсэн гэсэн урьдчилсан тооцоо гаргажээ.