Энэ жил нийслэлийн харьяа байгууллагууд төсвийн хөрөнгөөр шинэ жил тэмдэглэхгүй байхаар шийдвэрлэжээ. Харин үүний оронд нийслэлийн гэр хорооллынхон аливаа баяр ёслолоор орхигдсон байдалтай байдаг. Тиймээс дүүргүүдийн Засаг дарга нар гэр хорооллын тодорхой байршлуудад сүлд мод засч, хүүхэд хөгшдийг баярлуулах талаар илүү анхаарч ажиллахыг Э.Бат-Үүл сануулав.
Хотын даргын энэхүү санаачилга гарахаас өмнө урьтаад шинэ жилийн хүлээн авалтын захиалгаа аль эрт өгчихсөн байсан зарим төрийн байгууллага зоогийн газруудаас захиалгаа буцаах болсон байна.
 Түүнчлэн хотын дарга шинэ жилээр оргилуун дарснаас өндөр хатуулагтай согтууруулах ундаа хэрэглэхгүй байхыг нийслэлчүүд, аж ахуйн нэгжүүдэд уриаллаа. Цаг агаарын хувьд өмнөх жилүүдийнхээс илүү хүйтрэх төлөвтэй байгаа учраас иргэдийг бэртэж гэмтэх, осгож амь насаа алдахаас урьдчилан сэргийлэх үүднээс цагдаа, онцгой байдлын албанаас шөнийн эргүүл гаргаж ажиллуулахыг үүрэг болгосон байна.