УИХ-ын НББСШУ-ы байнгын хорооноос санаачлан Төрийн ордонд эх, хүүхдийн эрхийг хамгаалах асуудлын хүрээнд хэлэлцүүлэг өрнүүлж байна. Байнгын хорооны дарга З.Баянсэлэнгэ тэргүүтэй УИХ-ын эмэгтэй гишүүд энэ сарын 12-нд Эмэгтэйчүүдийн болон Хүүхдийн хорих ангид ажиллажээ. Энэ үеэр дээрх газруудад хүүхдийн эрх зөрчигдиж буй олон зүйл байгааг олж харсан аж. Тухайлбал, Эмэгтэйчүүдийн хорих ангид 10 эмэгтэй 0-1 хүртэлх насны хүүхэдтэйгээ хамт хоригдон ял эдэлж байгаа гэнэ. Учир нь онц хүнд гэмт хэрэг үйлдсэн эмэгтэйг хүүхэдтэй нь хамт ял эдлүүлдэг хууль манайд үйлчилдэг тул хүүхдийг нь тусад нь хүмүүжүүлэх боломжгүй юм байна. Мөн Хүүхдийн хорих ангид хоригдож байгаа нэг хүү ясны сүрьеэ өвчтэй болсныг тэрээр хэлж байв. Түүний хувьд ялаас нь чөлөөлөх шаардлага байгаа ч мөн л хуульд заасан заалтын дагуу боломжгүй аж. Энэ мэт хүндрэлтэй асуудлыг хэрхэн шийдвэрлэх тухайд хэлэлцүүлгийн үеэр хөндсөн юм.

Хууль зүйн яам, Улсын ерөнхий прокурорын газраас оролцож байгаа албан тушаалтнуудын тайлбараар Эрүүгийн хуульд өөрчлөлт оруулахаар хуулийн төсөл  боловсруулж буй юм байна. Уг хуулийн төсөлд Хүүхдийн хорих ангийг байхгүй болгон, оронд нь хаалттай сургууль бий болгож, насанд хүрээгүй хүүхдүүд хэрэг үйлдсэн бол түүнд сургаж төрөл бүрийн мэргэжил эзэмшүүлэх замаар нийгэмшүүлэхээр ял өгдөг хатуу бодлогоо өөрчлөхөөр тусгажээ. Мөн Онц хүнд гэмт хэрэг үйлдсэн эмэгтэйчүүд хүүхэд төрүүлбэл хүүхдээ нэг ой хүртэл нь асраад улмаар хүүхдээ Асран хүмүүжүүлэх төв юм уу эсвэл асран хамгаалагч нарт шилжүүлсний дараа ялаа үргэлжлүүлэн эдэлдэг байх заалтыг энэхүү шинэчлэн боловсруулж байгаа хуулийн төсөлд оруулж буй гэнэ.