Дархан-Уул аймагт найман настай хүүхдийг барьцаалж, эцэг эхээс нь 100 сая төгрөг нэхсэн хэрэг гарчээ. Аймгийн цагдаагийн байгууллагад энэ сарын 18-нд найман настай хүүхэд хичээлдээ явахаар гэрээсээ гараад сураггүй алга боллоо гэсэн дуудлага ирсэн гэнэ. Цагдаагийнхан ч энэ дагуу хүүг эрэн сурвалжилж эхэлсэн байна. Гэтэл тухайн өдрийн орой хэн нэгэн хүүгийн аав руу утасдаж, “Би танай хүүг барьцаалсан байна. 100 сая төгрөг авчирч өгөөд, хүүгээ ав” гэжээ. Үүнийг ч хүүгийн эцэг цагдаагийнханд мэдэгдсэн байна. Гэтэл маргааш нь хүү гэрийнхээ ойр орчимоос олдсон байна. Гэмт этгээд энэ явдлыг цагдаагийнхан мэдсэн учир хүүг гэрийнх нь ойролцоо авчираад зугтсан байж болзошгүй гэж үзэж буй аж.  
Энэ хэргийг тус аймгийн Эрүүгийн цагдаа, тагнуул, Мөрдөн байцаах албаны хамтарсан ажлын хэсэг шалгаж байгаа учир хүүгийн болон эцэг эхийнх нь нэрийг олон нийтэд зарлахаас цагдаагийнхан татгалзсан юм.