Нийтийн тээврийн газар ирэх онд 100 гаруй шинэ автобусаар парк шинэчлэлт хийхээр болжээ. Өөрөөр хэлбэл, нийслэлийн 2013 оны төсвийн 12 хувь буюу 28 тэрбум төгрөгийг нийтийн тээврийн салбарт зориулах бөгөөд том оврын автобусны паркийг шинэчлэхэд зарцуулах гэнэ. Эхний ээлжинд “Цахилгаан тээвэр” компанийн үйлдвэрлэж буй дуобусын шинэ загвараас 10 ширхгийг худалдан авахаар төлөвлөжээ. Харин 25 тэрбум төгрөгөөр нь их болон дунд багтаамжтай, том оврын шинэ автобус авах аж. Түүнчлэн шинэ автобус нь Евро стандартын гурав ба түүнээс дээш зэрэглэлд багтсан, утаа багатай, байгальд ээлтэй байх тул өртгийн хувьд харьцангуй өндөр байна хэмээн албаны хүмүүс мэдээлэв.