Баянзүрх дүүргийн шүүх өнөө өглөөнөөс “Анод” банкийг дампууруулсан хэргийг хэлэлцсэн боловч одоогоор шийдвэрээ гаргаагүй байна. Энэ хэрэгт 15 хүнийг сэжигтнээр татан шүүж байгаа учир шүүх хурал хоёр, гурван ч хоног үргэлжилж магадгүй нь. Учир нь, 15 шүүгдэгч шүүх бүрэлдэхүүнд тайлбараа хэлж, өмгөөлөгчид нь өмгөөллийн үгээ хэлнэ, прокурор яллах дүгнэлтээ танилцуулахад хугацаа их шаардана гэдгийг шүүх хуралд оролцсон зарим өмгөөлөгч хэлж байв. Тиймээс шүүх хурал маргааш ч үргэлжлэх юм байна.
“Анод” банкийг дампууруулсан, хуурамч хувьцаа гаргаж 1200 хүнийг хохироосон энэ хэрэгт банкны гүйцэтгэх захирал Д.Энхтөр, Тамгын хэлтсийн дарга Л.Уламбаяр, ТУЗ-ийн дарга Э.Гүр-Аранз, гишүүн Н.Даваа, Монголбанкны тэргүүн дэд ерөнхийлөгч Б.Энххуяг нарын 15 хүнийг яллагдагчаар татсан байгаа юм.