Нийслэлийн төсвийн хөрөнгө оруулалтаар яаралтай тусламжийн 30 машиныг ЯТТ-ын төвд өчигдөр  өглөө. Нэг бүр нь 62 сая төгрөгийн өртөгтэй, бүрэн тоноглогдсон авто машиныг ЯТТ-д өгснөөр түргэн тусламжийн үйлчилгээ хоёр дахин хурдсах юм байна. Эдгээр машины 18 нь бүрэн тоноглогдож, хүний зүрх гэнэт зогсох үед ашиглах аппарат, зүрхний бичлэг хийх, хүчилтөрөгчийн хангамж үзэх, өөр дээрээ цэнэг авдаг амьсгалын аппарат зэрэг яаралтай тусламжийг машин дотроо үзүүлэх нь. Харин үлдсэн машины тоног төхөөрөмжийг удахгүй суурилуулах гэнэ. Энэ үеэр Эрүүл мэндийн дэд сайд Ж.Амарсанаа “Түргэн тусламжийн машин хоёр дахин нэмэгдсэнээр түргэн тусламж хоёр дахин хурдан хүрнэ гэсэн үг.
Дуудлагын 50-60 хувь нь 20 минутад багтаж очдог гэсэн судалгаа байдаг. Нас баралтын гуравны хоёр  нь түргэн тусламжийг очихоос өмнө нас барсан байдаг. Бид олон хүний амийг аварч болох боломжийг алдсаар ирсэн. Түргэн тусламжийн үйлчилгээг сайжруулах зорилгоор Баянзүрх, Сонгинохайрхан дүүргийн хүүхдийн түргэнийг нийслэлтэй нэгтгээд байна. Жил бүр түргэн тусламжийг сайжруулах зорилгоор нийслэлийн төсөвт хөрөнгө суулгах болно” гэв. Харин хотын мэр Э.Бат-Үүл “Иргэдийн эрүүл аюулгүй байдлын үйлчилгээг сайжруулахад  түргэн тусламжийн үйлчилгээ чухал байдаг.
Нийслэлийн хэмжээнд 30 машин үйлчилгээнд явдаг байсан. Машин нэмэгдсэний хэрээр түргэн тусламжийн үйлчилгээ сайжирсан байх ёстой” хэмээв.  Хэдийгээр ЯТТ-д 30 машин нэмж байгаа ч нийслэлийн хэмжээнд 150 байвал хангалттай үйлчилгээ үзүүлэх юм байна.