Зэвсэглэн банк дээрэмдэхийг завдаж, хүний амь хөнөөсөн А.Бат-Ялалтын давж заалдах гомдлыг Нийслэлийн шүүх өчигдөр хянан хэлэлцээд анхан шатны шүүх рүү буцаах шийдвэр гаргалаа. Түүнд холбогдох хэргийг өмнө нь Налайх дүүргийн шүүх хэлэлцээд цаазаар авах ял оноосон юм. Гэвч давж заалдах шатны шүүхээс анхан шатны шүүх энэ хэргийг дахин нягтлан хэлэлцэх шаардлагатай гэж үзсэн байна.
А.Бат-Ялалт өнгөрсөн жил Налайх дүүрэг дэх ХААН банкны салбарын захирал эмэгтэйд буу тулган сүрдүүлж, мөнгө өгөхийг шаардан улмаар хажууд нь байсан нөхрийг нь буудаж аминд нь хүрсэн. Мөн банкинд үйлчлүүлж байсан иргэнийг барьцаалсан онц ноцтой хэрэг үйлдсэн билээ.