Та өглөө боссоныхоо дараа өмнөх оройноос илүү туранхай байгаагаа анзаардаг уу. Жин дээр зогссон ч ердийнхөөс хэдэн зуун граммаар бага татдаг шүү дээ. Тэгвэл энэ нь хүний бие дэх устай холбоотой гэнэ.
Хүн амьсгалах бүртээ уур хэлбэрээр усаа гадагш алдаж байдаг. Хэвийн температуртай өдөр л гэхэд зөвхөн амьсгалаар 350 мл ус гадагш ууршдаг байна. Энэ нь хүний биеийн жингээр бол 350 грам гэсэн үг. Үүнээс гадна хүн арьсаараа өдөр бүр 350 мл ус алддаг. Үүн дээр та ямар орчинд байна, хэр идэвхтэй хөдөлж байна гэдгээс хамаараад гадаад орчинд уурших усны их, багын хэмжээ хамаарч байдаг юм. Шөнийн цагт ердийн температурт маш бага хөдөлгөөнтэй нойрслоо гэхэд 100 мл ус алддаг бөгөөд хэрэв та хэт халуун орчинд унтсан бол илүү их ус ууршуулна гэсэн үг. Тэгэхээр энэ гурван хүчин зүйлээс хамаараад хүн өглөө босохдоо хөнгөхөн нэг килограмм жин хаясан байх нь бий. Хүн ингэж өөрөө ч мэдэхгүй усаа алддаг учир өглөө босоод хамгийн түрүүнд нэг аяга ус уухыг зөвлөдөг байна.