Хан-Уул дүүргийн Иргэдийн төлөөлөгчдийн хурлын сонгуульд Ардчилсан намаас 12 дугаар тойрогт нэр дэвшигч А.Гантулгыг дүүргийн сонгуулийн хороо нэр дэвшигчийн нэрийн жагсаалтаас хассан тогтоол энэ сарын 20-ны өдөр гаргасан. Уг тогтоолыг хүчингүй болгуулахаар Нийслэлийн захиргааны хэргийн анхан шатны шүүхэд гаргасан нэхэмжлэлийг өчигдөр авч хэлэлцжээ. Нийслэлийн захиргааны хэргийн анхан шатны шүүх нэхэмжлэлийг хэлэлцээд Хан-Уул дүүргийн сонгуулийн хорооны тогтоол хууль  зөрчсөн болохыг тогтоосон юм. Ингэхээр нэр дэвшигч А.Гантулгыг нэрийн жагсаалтаас хасах тухай тогтоолыг хүчингүй болгоно гэсэн үг. Мягмар гарагт орон нутгийн сонгуульд нэр дэвшигчдийн үнэмлэхийг гардуулсан учир түүнийг сонгуульд өрсөлдүүлэх боломжийг дүүргийн сонгуулийн хороо бүрдүүлж өгөх учиртай.
А.Гантулгыг Сонгуулийн тухай хуульд заасан нэр дэвших эрхийг хангахгүй байгаа гэсэн үндэслэлээр хассан юм. Сонгуулийн хорооны үндэслэл нь хуулийн дагуу байгаагүй учир шүүхээс сонгуулийн сурталчилгаа эхлэхээс өмнө ийнхүү шийдвэрлэсэн байна.