Хэвлэл мэдээллийн эрх чөлөөний тухай хуулийн төслийг УИХ-ын Төрийн байгуулалтын байнгын хорооны хуралдаанаар хэлэлцэн дэмжлээ. Энэ хуулийн төсөлтэй холбоотой 30 орчим зарчмын зөрүүтэй асуудлаар санал хураасан юм. Зарчмын зөрүүтэй саналууд дотор хэвлэл мэдээллийн эрх чөлөө, тэдний хараат бус байдлыг хангах гээд чухал асуудал олон байлаа. Тухайлбал, УИХ-ын дарга З.Энхболд, хэвлэл мэдээллийн хэрэгсэл, сэтгүүлчийн нийтэлсэн материал нь ор үндэслэлгүй гүтгэлэгийн шинжтэй байвал нэг түрүүнд уучлал гуйна гэсэн байсныг байнгын хорооны гишүүд дэмжсэн юм. Тэрчлэн сэтгүүлчийн бичсэн материал нийгэмд хор нөлөө үзүүлж хэн нэгний нэр хүндэд халдсан байвал тухайн сэтгүүлчийг хорьж цагдахаасаа илүүтэй зөвшилцлийн зарчмаар шийдэхээр хуулийн төсөлд заажээ. Тодруулбал, тухайн сэтгүүлч уулчлал гуйх ба тэдэнд торгуулийн арга хэмжээ авах хэлбэрээр шийтгэвэр ногдуулахаар заасан байв. Гэхдээ торгуулийн хэмжээг өндөр болгох нь хэрэгцээ байгааг УИХ-ын гишүүн Р.Бурмаа хэлж байлаа.
Мөн хэвлэл мэдээллийн хараат бус байдлыг хангах үүднээс хэвлэл мэдээллийн эздийг олон нийтэд зарлах тухай тусгасан нь гишүүдийн дэмжлэгийг авч байлаа. Энэ мэтчилэн  зарчмын зөрүүтэй асуудлаар санал хурааж энэ хуулийн төслийг хэлэлцүүлэх нь зүйтэй гэж үзэв.