Захиргааны хэргийн давж заалдах шатны шүүх өчигдөр Увс аймгийн нэр бүхий 13 иргэн болон тус аймгийн Ардчилсан намын нэхэмжлэхтэй хэргийг хэлэлцэж шийдвэрээ гаргажээ. УИХ-ын сонгуулийн 15 дугаар тойрог буюу Увс аймагт МАН-аас нэр дэвшсэн Б.Чойжилсүрэн, Ч.Хүрэлбаатар нарыг  иргэдийн гэрийг түрээсэлж байга нэрээр иргэдэд 100 мянган төгрөг тараасан, төрийн албан хаагч Ш.Чинбатыг сонгуулийн сурталчилгаанд ашигласан гэх хэргээр шүүхэд АН-аас нэхэмжлэл гаргасан байсан юм.  Энэ хэргийг өмнө нь тус аймгийн сонгуулийн тойргийн хороонд мэдэгдсэн ч хууль зөрчөөгүй гэсэн шийдвэр гаргаж байсан билээ. Харин Увс аймгийн Захиргааны хэргийн шүүхээс тойргийн хорооны шийдвэрийг хүчингүй болсон юм.
Харин өчигдөр 00:00 цаг хүртэл хуралдсан шүүх хурлаас УИХ-ын гишүүн Б.Чойжилсүрэн, Ч.Хүрэлбаатар нарыг хууль зөрчсөн иргэдийн саналыг худалдан авах зорилгоор бэлэн мөнгө тараасан, сонгуулийн сурталчилгааг хаасан үед мэдээллийн салбар ашиглан сурталчилгаа хийсэн, насанд хүрээгүй хүүхдийг сурталчилгаанд ашигласан, мөн төрийн жинхэнэ албан хаагч Ш.Чинбатыг сурталчилгаанд оролцуулсан гэж УИХ-ын гишүүний түр үнэмлэхийг нь хүчингүй болгож, СЕХ-ны холбогдох тогтоолыг хүчингүй болгох шийдвэр гаргажээ. Ингэснээр Б.Чойжилсүрэн, Ч.Хүрэлбаатар УИХ-ын гишүүнээр сонгогдсонд тооцсон тогтоолыг хүчингүй болгож, тус тойрогт 28-аас дээш хувийн санал авсан дараагийн хоёр нэр дэвшигч УИХ-д орж ирэх боломжтой болж байгаа юм.