УИХ-ын эмэгтэй гишүүдийн бүлгээс “Цагаан сараа шинэлэг тэмдэглэе” уриан дор Сар шинийн хувь, ургийн бичгийн аян өрнүүлж, үндэсний үйлдэрлэгчид, аж ахуйн нэгжүүдийн дунд уралдаан зарласан. Энэхүү уралдаан нь ард түмний үндэсний өв соёлыг тээж ирсэн үндэсний их баяр-Цагаан сарын ач холбогдлыг өргөж, жинхэнэ утга, бэлгэ дэмбэрлийг нь дээдлэн, ахмадууддаа дарамтгүй, ерөөлтэй сайхан баяр болгох зорилготой хэмээн эмэгтэй гишүүд тайлбарлаж буй.
Энэ уралдааны дүн гарч өнөөдөр Төрийн ордны Иргэний танхимд оролцогчдоос ирүүлсэн бүтээлийг дэлгэн харуулсан үзэсгэлэн гарав.
Соёл, спорт, аялал жуулчлалын сайд Ц.Оюунгэрэл энэ арга хэмжээнд оролцож  үг хэлэхдээ өвөг дээдсийнхээ уламжлалт соёлыг үр ач нартаа өвлүүлэн дэлгэрүүлж олон жил ургийн бичиг хөтөлж, айл өрхүүдэд үлгэрлэн түгээж байгаад нь ургийн бичиг хөтлөгчдөд талархлаа илэрхийлээд ССАЖЯ-ны жуух бичгийг 10-аад хүнд гардуулан үндэсний үйлдвэрийн шинэ бүтээгдэхүүний дээжээр бэлэг барьсан юм.  УИХ дахь эмэгтэй гишүүд, МЭХ-ны Удирдах зөвлөлөөс уралдаанд оролцсон Б.Дашцоодол, Н.Чагнаа нарын 10 хүн, “Зосын урт булаг”, “Баранзад туг”, “Монгол такс” компанид Өргөмжлөл, 40 гаруй хүнд Талархал гардуулж үндэсний үйлдвэрлэгчдийн шинэ бүтээгдэхүүний дээжээр урамшуулсны дээр МЭХ-ны Удирдах зөвлөлийн шийдвэрээр олон жилийн турш ургийн бичиг хөтлөн дэлгэрүүлж, 10 гаруй жил энэ чиглэлээр хичээл заасан Ц.Наранчимэг, Архангай аймагт ургийн баярыг архигүйгээр өвөрмөц, сайхан зохион байгуулж буй Ч.Намжилмаа нарыг шагнаж баярлуулсан юм.