Орон нутгийн сонгуулиар МАН есөн аймаг, дөрвөн дүүрэгт ялалт байгуулсан ч аймгуудын Засаг даргыг Ерөнхий сайд өнөөг хүртэл батламжлаагүй байгаад МАН-ынхан нэлээд бухимдаж буй. Энэ талаархи мэдээллийг Ерөнхий сайд Н.Алтанхуяг уржигдар Төрийн байгуулалтын байнгын хорооны хуралдаан дээр өгөх үеэр МАН-ын зарим гишүүд түүнтэй нэлээд маргалдсан. Энэ талаар УИХ-ын гишүүн Н.Номтойбаяраас тодрууллаа.

-Ерөнхий сайдыг хууль зөрчиж томилгоо хийсэн хэмээн танай нам үзсэн. Чухам ямар тайлбар өгсөн бэ?
-Ерөнхий сайд Н.Алтанхуяг Төрийн байгуулалтын байнгын хорооны хуралдаан дээр аймгуудын Засаг дарга нарын томилгооны талаар мэдээлэл өгөхдөө Дорнод аймгийн талаар нэг тодорхойгүй, нэг тодорхой мэдээлэл өгсөн. Тодорхойгүй мэдээлэл гэдэг нь тус аймгийн Засаг даргад нэрийг нь өргөн мэдүүлээд байгаа Бадамсүрэнгийн нэрийг буцаасан шалтгаанаа хэлээгүй. Харин нөгөө нэг асуудал нь хувийн компани аймаг хувьчилж авахтай би санал нийлэхгүй гэсэн. Нэр дэвшигчийг буцаагаад байгаа  шалтгаанаа тодорхой болгохгүй байгаа нь Үндсэн хуулийн таван зүйл заалтыг зөрчиж байна. Аймгийг нэг намд хувьчлахгүй гэж хэлснийг надад хандаж хэлсэн хэмээн ойлгож байгаа. Өмнө нь миний ажиллаж байсан компани 400 мянган тонн бензин, 300 мегаваттын эрчим хүч үйлдвэрлэн 3500 хүнийг ажлын байраар хангаж байсан. Энэ компани зөвхөн нэг аймаг ч биш улс орны эдийн засагт чухал нөлөө үзүүлж байгаа. Эдийн засгийн аюулгүй байдлын үндэсний хэмжээний томоохон бүтээн байгуулалт хийсэн. Үүнийг Ерөнхий сайд дэмжихгүй байгааг үнэхээр гайхаж байна. Шинэчлэлийн Засгийн газрын бодлого хаашаа чиглээд байгааг ойлгохгүй юм. Ерөнхий сайдын намын эрх ашгийг харсан үйлдлээс үүдэн Дорнод аймагт өдөр бүр жагсаал цуглаан болж байна. Үндсэн хуулийн 60.2, 62.2 дахь заалтад түүний хууль зөрчсөн үйлдлийн талаар маш тодорхой бичсэн байгаа.
-Цаашид Ерөнхий сайд энэ байр суурьтаа бат зогсвол танай намаас ямар арга хэмжээ авах вэ?
-Ерөнхий сайд хувь хүн, намын дарга. Аливаа асуудалд хувийн тааллаараа хандах нь зөв үү, хуулийн дагуу хандах нь зөв үү гэсэн маш том зарчмын зөрүүтэй асуудал гараад байна. Одоо энэ гараад байгаа маргаан түүний хувийн тааллаар хандсанаас үүдэлтэй.
-Орон нутаг төсөв баталчихсан. Засаг даргын үүрэг гүйцэтгэгчид төсөв захиран зарцуулах эрхтэй юу?
-Байхгүй. Аймгийн Засаг даргын тухайн орон нутгийн ИТХ-аас томилдог. Тэгэхээр хуульд үүрэг гүйцэтгэгч гэсэн зүйл заалт байхгүй гэсэн үг.