Дэлхийн уул уурхайн хамгийн том компаниудын нэг Рио Тинтогийн гүйцэтгэх захирал Том Албанез ашиггүй хийсэн гэрээ хэлцлээс болж компанид учруулсан хохирлынхоо хариуцлагыг хүлээж, суудлаасаа огцорлоо.  Дэлхийн санхүүгийн зах зээл адармаатай байх үед худалдан авсан орд газар, компаниуд нь өнөөдөр үнэ цэнээ алдаж, Рио Тинтод 14 тэрбум ам.долларын алдагдал хүлээлгэсэн тул компанийн захирлуудын зөвлөл хуралдаад Том Албанез цаашид гүйцэтгэх захирлаар ажиллах боломжгүй гэж үзжээ.  Рио Тинто компанид 30 жил зүтгэснээс сүүлийн тав, зургаан жил гүйцэтгэх захирлаар  ажилласан Том Албанез ч өөрийн алдаатай шийдвэрээ хүлээн зөвшөөрч, суудлаа өгнө гэдгээ мэдэгдсэн байна. Т.Албанезийн удирдлага дор гаргасан зарим шийдвэрүүд тухайлбал, асан өндөр үнээр худалдан авсан хөнгөнцагааны “Алкан” компани болон ердөө хоёр жилийн өмнө Мозамбикт хөрөнгө оруулсан нүүрсний орд газар гээд цөөнгүй төсөл нь өнөөдөр зах зээлд анх авч байсан ханшаас хамаагүй багаар үнэлэгдэх болоод байгаа юм. Түүнтэй хамт шийдвэр гаргалцсан Мозамбикийн нүүрсний төслийн гүйцэтгэх захирал ч компаниа орхихоор болсон байна. Том Албанез энэ асар их тоогоор яригдах алдагдлынхаа улмаас компаниасаа гарахдаа бонус, урамшуулал, тэтгэмж гээд юу ч авахгүй гэдгийг компанийн зүгээс мэдэгджээ. Гэхдээ түүний нэр дээр 10,7 сая фунтийн үнэ бүхий хувьцаа байдаг юм.