Дундговь аймгийн ИТХ Засаг даргаа сонгохоор дөрөвдэх удаагаа хуралджээ. Хуралдаанаар тус аймаг мөн л Засаг даргатай болж чадаагүй аж. Учир нь, Засаг даргад МАН-аас нэр дэвшсэн С.Сүхбаатар, АН-аас нэр дэвшсэн С.Од-Эрдэнэ нар 50:50 хувийн санал буюу тус бүртээ 17 төлөөлөгчийн санал авсан байна. Өмнө нь тус аймгийн ИТХ гурван удаа хуралдаж, эхний хоёр нь хууль бусаар хуралдсан байна гэдэг шалтгаанаар Ерөнхий сайд буцаагаад байсан бол гурав дахь удаагийн хурлаар дээрх хоёр нэр дэвшигч мөн л тэнцүү санал авч, гацаанд ороод байсан юм. Харин дөрөвдэх удаагийн хурлаар дахин тэнцсэн болохоор тав дахь удаагаа хуралдах уу, эсвэл тохиролцох уу гэдэг замыг сонгох л үлдлээ. Тус аймгаас УИХ-д сонгогдсон гишүүн Б.Наранхүүгийн хувьд,  аль болох хамтарч ажиллахыг хүсчээ. Гэхдээ түүний үгнээс АН-д Засгаа өгөөд хамтрахыг хүссэн ч олонхи нь хүлээн зөвшөөрөөгүй аж.