Ерөнхийлөгчөөс өргөн барьсан Хэвлэл мэдээллийн эрх чөлөөний тухай хуулийг хууль санаачлагч нь татан авснаар хэлэлцэх боломжгүй боллоо. Эл хуулийг УИХ-ын чуулганаар хэлэлцэх үеэр хуулийг төсөл гишүүдийн эсэргүүцэлтэй тулсан юм. Тухайлбал, УИХ-ын гишүүн Ц.Даваасүрэн, С.Ганбаатар, А.Тлейхан нар  эл хуулийн төсөл түүхий байгааг хэлсэн юм. Тодруулбал, эл хуулийн төслийн 8 дугаар зүйлд нь хэвлэл мэдээллийн хэрэгслийн далд эздийн эрх ашгийг хамгаалсан, сэтгүүлчдийн эрх ашгийг төдийлэн хангаагүй байна гэдэг шүүмжлэлийг хэлж байв. Харин эл хуулийн төслийн ажлын хэсгийнхэн харин ч далд эздэд хариуцлага тооцохоор тусгасан. Хэвлэл мэдээллийн хэрэгслийн нийтлэл нэвтрүүлэгт хөрөнгө оруулагч, эзэд оролцохгүй байхыг тусгасан. Энэ мэтээр маш олон зүйлийг өөрчилсөн хэмээн мэдэгдсэн. Тэрчлэн Сэтгүүлчдийн эвлэлийн Ерөнхийлөгч Б.Галаарид, “Энэ хуулийг хэлэлцэн батлах хэрэгтэй. Энэ хуульгүйгээр хэвлэл мэдээллийн байгууллагууд урагшаа явж, хөгжихгүй” хэмээн тайлбарлаж байсан. Гэсэн ч хуулийн төсөлтэй холбоотой шүүмжлэл өрнөж байх үед хууль санаачлагчийн зүгээс хуулийн төслийг татан авч байгаа бичгийг УИХ-ын даргад ирүүлэв. УИХ-ын дэгийн тухай хуулиар хэлэлцэж байгаа хуулийн төслийг хууль санаачлагч нь хуулийн төслийг татан авахаа мэдэгдсэн тохиолдолд хэлэлцэх боломжгүй болдог юм байна.