УИХ-ын чуулганы хуралдаанаар Уул уурхайн түр хороо байгуулах тухай асуудлыг хэлэлцэв. Хууль санаачлагчийн илтгэлийг УИХ-ын гишүүн Б.Бат-Эрдэнэ танилцуулсан юм. Энэ түр хороог байгуулахаар 26 гишүүн гарын үзэг зуржээ. Гэхдээ түр хорооны бүрэлдэхүүн Байнгын хорооны гишүүдээс илүү байх ёсгүй гэдэг үүднээс 18 хүн гарын үсэн зурсан аж. Энэ асуудлыг хэлэлцэхтэй холбоотойгоор УИХ-ын гишүүд асуулт асуусангүй. Харин УИХ-ын гишүүн Ц.Даваасүрэн, “Монгол орон эзгүйдэж байна.  Хаана ямар компани ямар ашигт малтмал ухаж байгааг мэргэжлийн байгууллагууд мэдэхгүй байна. Энэ асуудлыг хэлэлцэх гэхэд УИХ-ын гишүүд танхимаас гараад явчихлаа. Энэ уул уурхайтай холбоотой гишүүд хэмээн шүүмжлэв.
Ц.Даваасүрэн гишүүний хэлсэн үгийг УИХ-ын гишүүн Н.Номтойбаяр өлгөн авч, “Би энэ түр хороог байгуулахыг эсэргүүцээгүй. Гэхдээ төрийн нэрээр хөдөлмөр хийж байгаа хүмүүсээ хааж боох хэрэг байна уу. Үнэхээр ажил хийх гэж байгаа бол Эдийн засгийн байнгын хороо болон Хууль зүйн байнгын хорооноос ажлын хэсэг гаргаад ажиллаж болно шүү дээ” хэмээн хариу барив.
Харин хууль санаачлагч УИХ-ын гишүүн Б.Бат-Эрдэнэ, “УИХ-ын тогтоолоор хэн нэгнийг хавчих гээгүй. Хамгийн гол нь хариуцлагатай уул уурхайг хөгжүүлэхийг зорьж байгаа юм” гэсэн тайлбар өгөв. Ингээд энэ асуудлыг хэлэлцэх эсэхийг шийдэхээр санал хураахад гишүүдийн олонх нь дэмжиж анхны хэлэлцүүлгийг хийхээр Төрийн байгуулалтын байнгын хороонд шилжүүлэв.