УИХ-ын чуулганы өнөөдрийн хуралдаанаар Монгол Улсын Их Хурлын тухай хуульд өөрчлөлт оруулах тухай хуулийн төслийн хэлэлцэх эсэх асуудлыг үргэлжүүлэн хэлэлцлээ. УИХ-ын гишүүн М.Зоригт нарын санаачилсан уг хуулийн төсөлд нам, эвслийн бүлэгт чуулганы нэгдсэн болон Байнгын хорооны хуралдаанд бүлгийн гишүүдийнхээ ирцийг 50 болон түүнээс дээш хувиар хангаж оролцуулах үүрэг хүлээлгэж, энэ үүргээ 8-аас дээш удаа биелүүлээгүй бүлгийг татан буугдсанд тооцож байхаар тусгасан юм.
Энэ хуулийн төсөл нь нэлээдгүй эсэргүүцэлтэй тулгарсан юм. Тэр тусмаа цөөнхийн бүлгийн гишүүд хамгийн их эсэргүүцэж байгаа нь илэрхий байсан юм. Өчигдрийн хуралдаанаар хэлэлцүүлгийг хийсэн болохоор өнөөдрийн хуралдаанаар дэмжсэн, эсэргүүцсэн тус бүр гурван гишүүн үг хэлсний дараа санал хураалт явуулахад хуралдаанд оролцсон гишүүдийн олонхи хэлэлцэхийг дэмжлээ. Энэ үеэр УИХ-ын дарга З.Энхболд УИХ-ын тухай хуульд өөрчлөлт оруулах тухай өргөн баригдсан хуулийн төслүүдийг энэ хаврын чуулганаар хэлэлцэн шийдвэрлэж дуусгахаар шийдвэрлэсэн гэдгийг хэлсэн юм.