УИХ-ын гишүүн С.Бямбацогт, Д.Лүндээжанцан, Су.Батболд нар өнөөдөр хэвлэлийнхэнд мэдээлэл хийлээ. Тэд өчигдөр бүлгийн хурал дээрээ ҮХААЯ-ны дэд сайд Ц.Тувааны мэдээллийг сонсож, бараа бүтээгдэхүүний үнэ ханшийн өсөлт, тэр дундаа монголчуудын хамгийн гол хэрэглээ болох гурил, махны үнийн өсөлтийг судлах ажлын хэсэг байгуулсан тухайгаа мэдэгдсэн юм. Энэ ажлын хэсгийг нь УИХ-ын гишүүн Су.Батболд ахалж байгаа аж. Тэдний хэлж байгаагаар, “ҮХААЯ, Монгол банктай хамтарч мах, гурилын үнийг тогтворжуулах дэд хөтөлбөр хэрэгжүүлж 720 тэрбум төгрөг төсвөөс гаргуулсан. Махны салбарт 81, гурилийн салбарт 61 тэрбум төгрөгийг хөнгөлөлттэй зээлээр олгож байгаа ч үр дүн гарахгүй байна. Иргэдийн хамгийн их хэрэглэдэг “Алтантариа” компанийн нэгдүгээр зэрэглэлийн гурил нэг кг нь 1000 төгрөг болсон байна. Гэтэл ҮХААЯ гурил үйлдвэрлэгчидтэй гэрээ хийхдээ нэг кг гурилын үнийг 550 төгрөгт барина гэсэн нь энэ дэд хөтөлбөр үр дүнгээ өгөхгүйгээр барахгүй харин ч үнэ өндөр болсон байна. Гэтэл өмнөх Засгийн газрын үед иргэн бүрт сар болгон 21000 төгрөг өгдөг байсан. Энэ үед юмны үнэ ингэж өсөөгүй. Мөн сар болгон 21000 төгрөгийг олгоход 300 гаруй тэрбум төгрөг л болдог байсан. Гэтэл энэ их мөнгөний үр дүн гарсангүй” гэдгийг хэлсэн юм. Тиймээс ажлын хэсэг гаргаж, дээрх мөнгийг хэчнээн компанид ямар хэмжээтэйгээр олгож үнэ тэнцвэржүүлэх арга замыг хайж байгааг судлах юм байна.
Мөн сар шинийн баяр дөхөж байгаа энэ үед цас зудтай байгаа малчдынхаа сэтгэл санааг дээшлүүлэхийн тулд хандивын аян өрнүүлж байгаа аж. Тэрчлэн үйлдвэрлэгчдийг бараа бүтээгдэхүүнээ өгсөх бус, бууруулж бэлэх барихыг намын бүлгийнхээ нэрийн өмнөөс уриалж байна гэдгээ хэллээ.