УИХ-ын дарга З.Энхболдын урилгаар Бүх Хятадын Ардын Төлөөлөгчдийн Их Хурлын Байнгын хорооны дарга У Бангуо манай улсад албан ёсны айлчлал хийхээр ирээд байна. Тэрээр өчигдөр “Чингис хаан” олон улсын нисэх буудалд тусгай нислэгийн онгоцоор газардлаа. У Бангуог Монголын талаас УИХ-ын дэд дарга М.Энхболд, Монгол Улсаас БНХАУ-д суугаа Онц бөгөөд Бүрэн эрхт Элчин сайд Ц.Сүхбаатар,  УИХ-ын Тамгын газрын Ерөнхий нарийн бичгийн дарга Б.Болдбаатар, ГХЯ-ны Хөрш орнуудын газрын захирал Т.Төгсбилгүүн нар, Хятадын талаас БНХАУ-аас Монгол Улсад суугаа Онц бөгөөд Бүрэн эрхт Элчин сайд Ван Шао Лун, Элчин сайдын яамны нэгдүгээр нарийн бичгийн дарга Чан Ваньлун болон албаны бусад хүн угтсан юм.


У Бангуог дагалдаж БНХАУ-ын Гадаад явдлын дэд сайд Жан Жизюнь, БХАТИХ-ын Санхүү, эдийн засгийн комиссын даргын орлогч Вэй Лючэн, БХАТИХ-ын Байнгын хорооны Ерөнхий нарийн бичгийн даргын орлогч Цао Вэйжоу, БНХАУ-ын Худалдааны дэд сайд Жун Шань нарын албаны хүмүүс, хэвлэл мэдээллийн 30 гаруй байгууллагын сурвалжлагч иржээ. БХАТИХ-ын Байнгын хорооны дарга У Бангоугийн айлчлал нь УИХ-ын 2012 оны сонгуулиар байгуулагдсан шинэ парламентын хувьд хоёр дахь, 2013 оны анхны томоохон айлчлал юм. У Бангуог угтах хүндэтгэлийн ёслол өчигдөр 15:30 цагт Сүхбаатарын талбайд боллоо. Тэрээр УИХ-ын дарга З.Энхболдтой Чингис хааны хөшөөнд ёслож, хүндэтгэл үзүүлэв. У.Бангуо Төрийн ордны Баганат танхимд хүрэлцэн ирж, Хүндэтгэлийн дэвтэрт гарын үсэг зурсны дараа УИХ-ын дарга З.Энхболдтой хэлэлцээ хийсэн юм.