Орон нутгийн сонгуульд Орхон аймагт АН-аас нэр дэвшин сонгогдсон Р.Улаанхүүг хүний аминд хүрчээ хэмээн худал мэдээлэл тараасан хэрэгт буруутгагдаад буй МАН-ын Мэдээллийн технологийн хэлтсийн дарга, Бага хурлын гишүүн Б.Цогтгэрэл батлан даалтад гарчээ. Түүнийг энэ сарын 8-нд ШШГЕГ-ын харьяа цагдан хорих 461 дүгээр ангид саатуулж, эрүүгийн хуулийн 111.2 хэсэгт зааснаар бусдыг онц ноцтой гэмт хэрэгт гүтгэсэн, эрх чөлөөнд нь санаатайгаар халдсан гэх шалтгаанаар Эрүүгийн хэрэг үүсгэн шалгаж байсан юм. Хоригдох хугацаанд түүний биеийн байдал муудаж, ар гэрийнхэн нь батлан даалтад гаргуулах хүсэлт тавьсан ч Чингэлтэй дүүргийн прокурорын газраас түүнийг гаргахгүй гэсэн хариу өгч байсныг эхнэр нь твиттер хуудсаараа нийтэлж байсан. Тэгвэл түүний биеийн байдал муудсанаас үүдэн Б.Цогтгэрэлийг батлан даалтад гаргажээ.