МАН-ын Удирдах зөвлөл парламент дахь бүлэгтэйгээ хамтран өчигдөр өргөтгөсөн хурал хийлээ. Энэ хурлаараа Ерөнхийлөгчийн сонгуульд нэр дэвшүүлэх хүнээ олон нийтийн санал асуулгаар тодруулах ажлын хэсэг байгуулсан байна. Санал асуулгад аймаг, сум, дүүрэгт оршин суугаа сонгуулийн насны иргэдийн 50-иас доошгүй хувийг оролцуулахаар тооцоолсон гэнэ. Мөн МАН-аас хэн энэ сонгуульд өрсөлдвөл олон санал авах талаар нэр дэвшигчийн рейтингийн судалгаа ч хийжээ. Гэвч судалгааны дүнгээ тэд нууцлаж байгаа юм. Үндсэндээ, олон нийтийн санал асуулга, нэр дэвшигчийн рейтингийн судалгааг харьцуулж, Ерөнхийлөгчийн сонгуульд дэвшүүлэх хүнээ тодруулахаар болж.

Тэгээд ч шууд тэр гэж нэрлээд Ерөнхийлөгчийн сонгуульд сойх лидер МАН-д байхгүй гэх болсон. Тэднийг аргаа барсандаа олон нийтээс санал асуухад хүргэлээ гэж шүүмжлэх нэгэн ч байна.

Өргөтгөсөн хуралдаанаар өөр нэг хэлэлцсэн асуудал нь МАН дэргэдээ байнгын хороо байгуулах. Таван чиглэлээр үйл ажиллагаа явуулах байнгын хороотой болж, эдгээр нь дотроо дэд хороонд хуваагдах гэнэ. Чиглэл нь тодорхойгүй ч өмнө нь сайд, даргын алба хашиж байсан хүмүүсээр эл байнгын хороодыг толгойлуулахаар ярьжээ. Өөрөөр хэлбэл, засгийн эрх солигдсоноор албан тушаалгүй болж лааз өшиглөж яваа хүмүүстээ зориулж ийн орон тоо гаргасан бололтой.

Өөр нэг асуудал бол УИХ-ын Тамгын газрын ерөнхий нарийн бичгийн дарга асан Ц.Шаравдоржийн МАН, МАХН-ын гишүүд, дэмжигчдэд илгээсэн ил захидал өчигдрийн өдөр тутмын зарим сонинд хэвлэгдсэн нь ч тэдний анхаарлаас гадуур өнгөрсөнгүй. Ил захидалд энэ хоёр намыг нэгтгэх шаардлагатай байгаа тухай өгүүлсэн. Нэг угшилтай, нийтлэг чиг баримжаатай хоёр нам хамтран ажиллах ёстойг ч учирлажээ. Өнгөрсөн оны сонгуулиудад МАН-ынхан АН-ыг хүнийх, МАХН-ыг өөрийнх гэлгүй адилхан басан, өрөөсөн гутлаа гээснээ мэдрэх чадваргүй оролцсоны үр дүн өнөөдөр харагдаж байна гэж МАН-ынхны алдааг ч ил захидалд дурдсан. МАХН-тай нэгтгэх асуудлыг хуралд оролцсон МАН-ынхан дэмжсэн байр суурьтай байсан сурагтай. Харин энэ хоёр нам нэгдлээ гэхэд алиных нь туг далбаа, тамга тэмдгийг ашиглах вэ, үүнийг шоронд суугаа Н.Энхбаяр зөвшөөрөх үү, парламентын бүтцэд өөрчлөлт орох уу, хамтарсан Засгийн хувь заяа хэрхэх вэ гээд олон асуудал хөвөрнө.  

МАН-ынхан М.Энхсайханд нөлөөлж, Шинэчлэлийн Засгийн газрын унагах зорилготой тактик ч боловсруулаад эхэлсэн сурагтай. Ямартай ч, улс төрийн хүрээнд МАН-аас хамааралтай ямар үйл явдал өрнөхийг ирэх өдрүүд харуулах биз ээ.