Монгол Улсын Ерөн­хийлөгч, Зэвсэгт хүчний Ерөнхий командлагч Ц.Эл­бэгдоржийн Бүгд найрамдах Өмнөд Судан улсад хийсэн айлчлалын үеэр Румбек мужийн нэгэн дунд сургуулийг Монгол Улсын төрийн тэргүүний нэрэмжит болголоо.
Румбек мужийн за­хи­раг­чийн албан ёсны мэдэг­дэлд “Монгол Улс бол ард­чил­сан хувьсгалыг тайван замаар хийж чадсан цөө­хөн орны нэг бөгөөд Ерөн­хийлөгч Ц.Элбэгдорж энэ­хүү хувьсгалын гарамгай удир­дагчдын нэг болохын хувьд, мөн Өмнөд Суданд энхийг сахиулах ажиллагаанд цэргээ илгээсэн улсаас анх удаа айлчлан ир­сэн төрийн тэргүүний хувьд хоёр улсын найрамдалт харилцааны бэл­гэ­­дэл болголоо” хэмээгээд му­жийн­хаа сургуулийг Монгол Улсын Ерөн­хийлөгчийн нэ­рэмжит болгож буйгаа зарласан байна.  Энэ үеэр тус мужийн захирагч Монгол Улс аугаа их түүхтэй, цэрэг, тактикийн өв их уламжлалтай орны хувьд энэхүү нэрэмжит сургуульд монгол цэргүүдээр спорт, тактикийн болон Монголын түүх, соёлын тухай хичээл заалгах хүсэлтэй байгаагаа илэрхийлжээ.
Ерөнхийлөгч Ц.Элбэгдорж шинэхэн тусгаар улсын хүүхэд багачуудын сурч боловсрох сургууль өөрийнх нь нэрэмжит болсонд талархаж буйгаа илэрхийлээд “Энэ бол Монгол Улсын энхийг сахиулагчдын үйл ажиллагаанд орон нутгийн иргэдийн тавьж байгаа эерэг дүнгийн нэгэн илрэл, хоёр орны хамтын ажиллагаа, найрамдлын өөдрөг эхлэл” гэв.