МАХН-ын дарга, Ерөн­хийлөгч асан Н.Энхбаяр Улсын Дээд шүүхийн Ерөнхий шүүгч Ц.Зоригтод хандан гомдол гаргажээ. Тэрээр гомдолдоо “Миний бие хараат хууль, шүүхийнхний гаргасан илэр­хий буруу шийдвэрийн “ач буян”-аар ялтан хэмээх “эр­хэм” нэрийг зүүн хэлмэгдэж байна” гэдгээ онцлоод хавтаст хэргийг Улсын Дээд шүүхийн нийт шүүгчдийн хуралдаанаар хэлэлцүүлж өгөхийг хүссэн байв.
Тус шүүх хяналтын шат­ны шүүх хуралдаанаараа Н.Энх­баяр, До.Чулуунбаатар, Ж.Мяг­маржаргал, Д.Дуламсүрэн нарт холбогдох хэргийг өнгөрсөн оны арванхоёрдугаар сард хэлэлцээд анхан болон давж заалдах шатны шүүхийн шийтгэх тогтоол, магадлалд өөрчлөлт оруулсан юм. Тодруулбал, Н.Энхбаяр, Ж.Мягмаржаргал нарт холбогдох “Эрдэнэт” үйлдвэрт ган бөмбөлөг нийлүүлэх нэрээр 3.9 тэрбум төгрөгийн хохирол учруулсан хэрэг нь нотлогдохгүй байна гэж үзээд хэрэгсэхгүй болгохоор шийдвэрлэсэн. Ингэснээр тэдэнд оноосон ялын хэмжээ ч буурч, анхан шатны шүүхээс Н.Энхбаярт оноосон дөрвөн жил хорих ялыг хоёр жил зургаан сар, Ж.Мягмаржаргалд оноосон гурван жил зургаан сарын хорих ялыг нэг жил болгон өөрчилсөн билээ. Харин До.Чулуунбаатарт оноо­­сон хоёр жил нэг сарын ял, Д.Дуламсүрэнг өршөөн хэлтрүүлснийг хэвээр үлдээсэн юм.
Н.Энхбаярын өмгөөлөгч нар эл шийдвэрийг хүлээн зөвшөөрөхгүй гэдгээ илэр­хийлж, мөн л Ерөнхий шүүгчид гомдол бичсэн. Тэдний гомдлыг хүлээн авсан ч, нийт шүүгчдийн хуралдаанаар хэргийг хэлэлцэхгүй байгаа учир Н.Энхбаяр өөрөө Ерөнхий шүүгчид гомдол хаяглан хүргэсэн гэнэ.
Энэ он гарснаас хойш нийт шүүгчдийн хуралдаан нэг ч удаа болоогүй. Улсын Дээд шүүхийн хяналтын шатны хуралдааны шийдвэрийг хүлээн зөвшөөрөхгүй бол шүүгдэгч Ерөнхий шүүгчид гомдол бичиж, нийт шүүгчдийн хуралдаанаар хэргээ дахин хянан шийдвэрлүүлэх эрхтэй. Ингэхдээ ихэвчлэн ялын дээд хэмжээ буюу цаазаар авах ял сонссон хүний хэргийг хянан шийдвэрлэдэг. Тиймээс Н.Энхбаяр нарт холбогдох хэргийг нийт шүүгчдийн хуралдаанаар хэлэлцэх шаард­лагагүй гэж үзсэн бололтой.