МАХН-ын Бага чуулганы наймдугаар хурал өнөөдөр боллоо. Бага чуулганаар хэд хэдэн асуудлыг шийдвэрлэхээр төлөвлөжээ. Тухайлбал, МАХН Ерөнхийлөгчийн сонгуульд хэрхэн оролцох, МАН-тай нэгдэж оролцох эсэх, намын бүтэц бүрэлдэхүүнээ шинэчлэх асуудлыг ярилцаж байгаа аж. Тус намын Ерөнхий нарийн бичгийн дарга Г.Шийлэгдамба бага чуулганыг нээж улс төрийн илтгэл тавьсан юм. Түүний илтгэлд МАН, МАХН хоёр нэгэнт адил угшилтай нам болохоор Ерөнхийлөгчийн сонгуульд хамтарч оролцоход боломжгүй гэх зүйл үгүй гэдгийг дурьджээ. Гэхдээ хоёр намын удирдлагын түвшинд ярилцаж тохиролцох зүйл олон байгааг дурьдсан. Хэдийгээр МАХН-ын удирдлагууд ийм байр суурь илэрхийлж байгаа ч гол нь намын гишүүд дэмжигдчдээсээ асууж, тэднийхээ саналын үндсэн дээр тулгуурлаж байж шийдвэр гаргах нь зүйн хэрэг гэдгийг тэрээр онцолж байв.
Мөн МАХН-ын үйл ажиллагааг бэхжүүлэх үүднээс аймаг, суманд тус намын мянгат, зуутын бүлгийг байгуулах ажлыг хийхээр зэхжээ. Ингэхдээ мянгат, зуутын бүлгийг ахалж ажиллах боловсон хүчнийг сонгон шалгаруулж авна гэдгээ хэлж байв.
Бага чуулганаар энэ мэт хэлэлцэх асуудал нэлээд байгаа юм. Харин намын их хурлыг энэ оны сүүлээр хийхээр товложээ.