Монгол Улсын Үндсэн хуулийн цэц Засгийн газрын тэргүүн, Ерөнхий сайд Н.Алтанхуяг зарим албан тушаалтныг томилохдоо Монгол Улсын Үндсэн хуулийг зөрчсөн эсэх маргааныг хэлэлцлээ.
Монгол Улсын Ерөнхий сайд Н.Алтанхуяг 83 дугаар захирамжаар ТЕГ-ын газрын дэд даргаар Б.Ариунсанг томилохдоо Тагнуулын тухай хуулийн 15,2 буюу гүйцэтгэх ажлын туршлагатай байх гэдэг заалтыг  зөрчсөн шийдвэр гаргасан гэсэн иргэн Ламжавын  гомдлоор Үндсэн хуулийн цэц маргаан үүсгэн хэлэлцсэн юм.  
ҮХЦ-ийн дунд суудлын хуралдаан эхлэхийн өмнө Ерөнхий сайд Н.Алтанхуягийн итгэмжлэгдсэн төлөөлөгч ЗГХЭГ-ын Хуулийн хэлтсийн дарга Мөнх-Эрдэнэ “Ерөнхий сайд 46 дугаар тогтоол гаргаж Б.Ариунсанг ТЕГ-ын дэд даргаар томилсон шийдвэрээ хүчингүй болгосон. Ийм учраас ҮХЦ-ийн хуралдааныг хийхгүй байхыг хүсье” гэсэн ч  энэ нь оройтсон, хуралдаан нэгэнт эхэлсэн учраас гээд асуудлыг үргэлжлүүлэн хэлэлцсэн юм.
Эцэст нь ҮХЦ –ийн дунд суудлын хуралдаан Засгийн газрын тэргүүн Н.Алтанхуяг буруутай үйлдлээ залруулан шийдвэр гаргаж хүчингүй болгосон тул Үндсэн хуулийн цэц асуудлыг хэлэлцэж дүгнэлт гаргах шаардлагагүй гэж үзсэн байна.
Харин нэхэмжлэгч иргэн Ламжав болохоор  нэгэнт л тогтоол шийдвэр гаргаж хүнийг албан тушаалд томилсон болохоор энэ нь Монгол Улсын Үндсэн хуулийг зөрчсөн эсэхийг Үндсэн хуулийн цэц хянаж дүгнэлт гаргахад буруудахгүй. Тэгэхээр энэ асуудлыг цаашид хэлэлцэж болох юм гэсэн байр суурьтай байгаагаа сэтгүүлчдэд хэлсэн юм.