Шадар сайд Д.Тэрбишдагва Онцгой байдлын ерөнхий газрын дарга Т.Дуламдоржид хурандаа цол олгосон нь Засгийн газрын тухай хууль болон Гамшгаас хамгаалах тухай хуулиар олгоогүй эрх эдэлж, хууль зөрчлөө хэмээн иргэн П.Сэрсмаа Үндсэн хуулийн цэцэд өргөдөл хаяглажээ. Түүний эл гомдлыг Үндсэн хуулийн цэц хүлээж аваад маргаан үүсгэхээр болсон байна. Иргэн П.Сэрсмаа өргөдөлдөө Шадар сайд өөртэй нь хамаарал бүхий эдгээдийн хувийн ашиг сонирхолд нийцүүлэн захиргааны акт үйлдэх эрхгүй гэж бичсэн байв.  Мөн тэрээр Т.Дуламдоржийг ОБЕГ-ын даргаар томилсон Засгийн газрын тогтоолыг хүчингүй болгуулахаар Ерөнхий сайд Н.Алтанхуяг болон УИХ-ын дарга З.Энхболдод ч хандсан гэнэ. Тэрээр Засгийн газрын тогтоолыг хүчингүй болгуулах тухай өргөдөлдөө Д.Тэрбишдагва Нийтийн албанд нийтийн болон хувийн ашиг сонирхлын зөрчлөөс урдьчилан сэргийлэх тухай хуулийн болон Төрийн албаны тухай хуулийн холбогдох заалтыг зөрчиж, туслахаараа олон жил ажилласан хүнийг томилуулсан гэжээ. Тодруулбал, Нийтийн албанд нийтийн болон хувийн ашиг сонирхлын зөрчлөөс урдьчилан сэргийлэх тухай хуулийн 12.1-д “Албан тушаалтан өөрийн болон өөртэй нь хамаарал бүхий этгээдийн хувийг ашиг сонирхолд нийцүүлэн захиргааны акт гаргахыг хориглоно”,  Төрийн албаны тухай хуулийн 10.1-д “Төрийн албан тушаалд тавих ерөнхий шаардлага нь хуульд өөрөөр заагаагүй бол тухайн албан тушаалыг эрхлэх мэдлэг, боловсрол, туршлага, ур чадвартай, мэргэшсэн байх явдал мөн” гэснийг зөрчсөн гэж үзсэн байна.
Ерөнхий сайд дээрх гомдлыг хүлээж аваад ЗГХЭГ-ын дарга Ч.Сайханбилэгийг энэ асуудлыг шийдвэрлэ гэсэн цохолт хийсэн боловч асуудлыг өнөөг хүртэл шийдвэрлэхгүй байгаа гэнэ.