Манай улс газрын доорх баялгаараа дэлхийд “моодонд” орж байгаа ч өнөөг хүртэл эрдэс баялгийн талаар төрөөс баримтлах бодлогогүй явж ирсэн. Уг нь, өмнөх Засгийн газрын Эрдэс баялаг, эрчим хүчний яамнаас ийм бодлоготой болохоор ажлын хэсэг гаргасан ч удалгүй замхарсан. Харин Монгол Улсын Ерөнхийлөгчийн өнгөрсөн сарын 7-ны захирамжаар “Эрдэс баялгийн салбарт төрөөс баримтлах бодлогын баримт бичиг” боловсруулах ажлын хэсгийг Уул уурхайн сайдаар ахлуулан байгуулжээ. Мөн дээрх ажлын хэсгийг мэдээллээр хангах, судалгаа хийх үүрэг бүхий Дэд ажлын хэсгийг байгуулсан аж. Бид эрдэс баялгийн бодлоготой болсноор манай улсын геологийн бүтэц, тогтоц, ашигт малтмалыг үе шаттайгаар шинжлэх ухааны үндэслэлтэй судлан, эрдэс баялгийн санг баяжуулан, ил тод хариуцлагатай уул уурхайг хөгжүүлэх хөшүүрэг болох гэнэ. Мөн экологийн тэнцвэрт байдлыг хадгалан нэмүү өртэг шингээсэн бүтээгдэхүүн үйлдвэрлэх замаар Монгол Улсын эдийн засгийн өрсөлдөх чадварыг дээшлүүлэх зорилготой юм байна.
Ингэснээр эрдэс баялгийн нөөцийн өсөлтийг уул уурхайн үйлдвэрлэлийн хөгжлийн төвшингөөс 10-аас доошгүй жилээр түрүүлэн бэлтгэх, хариуцлагатай уул уурхайн зарчмыг баримтлах ач холбогдолтой юм.