УИХ дахь АН-ын бүлгийн дарга Д.Эрдэнэбатаас дараахь зүйлийг тодрууллаа.  


-УИХ-ын хаврын чуулганы нээлттэй зэрэгцэн сөрөг хүчнийхэн жагсаал хийж,  УИХ дахь МАН, МАХН-ын гишүүд хуралдаанаа хаяж гарлаа. Чуулганы нээлтэд Ерөнхийлөгчийн хэлсэн үгийг сөрөг хүчнийхэн үгүйсгэн, тайлбарлаж байна. Таны хувьд үүнд ямар байр суурь илэрхийлэх вэ?
-Төрийн тэргүүн өнөөдрийг хүртэлх энэ төрд байгаа зөв, алдаатай зүйлийг ч хэлсэн. Харин манай цөөнхийн бүлэг жаахан яарчихав уу гэж харагдлаа. Ерөнхийлөгч өмнөх алдаагаа давтахгүй байх тухай ярихад УИХ-ын зарим гишүүн хурал хаяж гарсан. Үнэхээр Төрийн тэргүүн болохгүй зүйлийг шударга хэлсэн. УИХ-д байгаа дутагдлыг ч хэллээ. Үүнийг хүлээх  тэвчээр цөөнхөд алга. Гэхдээ өөрсдийн шийдвэр өөрсдөдөө нь зөв байх. 

-Сөрөг хүчнийхэнтэй “100 мянган айлын орон сууц” хөтөлбөрийн хохирогчид нэгдэн жагслаа. Танай намын зүгээс орон сууцны хөнгөлөлттэй зээлд хамрагдах гээд хохирсон иргэдийн асуудлыг хэрхэн шийдвэрлэх ёстой гэж үзэж байна вэ?
-Үүнийг өмнөх Засгийн газрын үед санаачилж хийсэн ажил. Гэтэл энэ Засгийн газарт хариуцлага үүрүүлж, буруу өгөх нь зөв үү, буруу юу гэдгийг бодох л хэрэгтэй.  Ингэж хэлснээрээ би өнөөдрийн Засгийн газрыг өмөөрсөн юм биш. Бид хаврын чуулганы хуралдаанаар нэг асуудлыг яаралтай хэлэлцэх хэрэгтэй гэдэгт санал нэгдсэн. Тэр нь, Моргейжийн зээлийн тухай хууль батлах. Болж өгвөл энэ сард багтаагаад Засгийн газарт асуудлаа оруулаасай гэж хүсч, хүлээж байна. Цаашид ийм маягаар иргэдийг хохироох үйлдэл хийж болохгүй.

-Ерөнхий сайдыг хоёр ч удаа Үндсэн хууль зөрчлөө гэж МАН-ынхан хэлж байна. Үүнээс болж огцруулах асуудлыг ч хөндөхөө илэрхийлсэн?
-Ерөнхий сайдыг Үндсэн хууль шууд зөрчсөн гэж үзэхгүй байна. Ерөнхий сайдын эрх мэдлийн хүрээнд захирамжийг хэрхэн гаргах ёстой, яаж хүчингүй болгох гэх мэт үйл ажиллагааг хийсэн гэж харж байгаа.

-Увс аймагт нэр дэвшсэн УИХ-ын гишүүн Ч.Хүрэлбаатар, Б.Чойжилсүрэн нарт холбоотой шүүхийн шийдвэрийн тухай та юу хэлэх вэ?
-Улсын Дээд шүүхийн шийдвэрийг эцсийнх гэж ойлгож байна. Сонгуулийн үеэр мөнгө тараасан нь ял сонсоод, тараалгасан нь УИХ-ын гишүүн болоод сууж байгаа шүү дээ. Харин одоо СЕХ эрхийнхээ хүрээнд шийдвэрээ гаргах байх.

-Танай намын бүлгийн гишүүн С.Баярцогт хөрөнгө, орлогын мэдүүлгээ худал мэдүүлсэн асуудал гарлаа. Түүнд ямар хариуцлага тооцох талаар танай бүлгийнхэн ярилцсан уу?
-Энэ талаар УИХ-ын гишүүн С.Баярцогт өөрөө тайлбар өгсөн. Хөрөнгө, орлогын мэдүүлгээ бөглөхдөө алдаа гаргасан гэж үнэнээ хэлсэн. Гэхдээ энэ бол УИХ-ын гишүүний хариуцлагатай холбоотой асуудал учраас намын бүлэг хэлэлцэх нь зохимжгүй. Манай бүлгийн хувьд энэ асуудлыг жижиг зүйл гэж үзэхгүй байгаа. Энэ бол алсаас шидсэн зүйл болов уу. Үнэхээр ёс зүйн алдаа гаргасан уу гэвэл гаргасан. Тиймээс хариуцлага үүрэх ёстой. Энэ асуудлыг УИХ ойрын хугацаанд шийднэ.
Гэхдээ энэ асуудалтай холбогдуулан хэлэхэд, Монголын төрийн албан хаагч гадаадад ямарваа нэг хэмжээгээр нуугдмал данстай, бүртгүүлээгүй компанитай байвал зохицуулах эрх зүйн орчин хэрэгтэй юм байна гэсэн дохио өглөө. Монгол Улсын эдийн засаг өргөжиж байна. Уул уурхай нь дэлхий нийтийн анхаарлыг төвд байгаа үед Монголын улстөрчдийг янз янзын байдлаар цаашид иймэрхүү асуудалд холбогдуулахгүй гэсэн баталгаа алга. Тиймээс цаашид аль аль талдаа үүнийг анхаарах ёстой.
Энэ бол улс эх орны хувь заяаны асуудал. Өнөөдөр энэ асуудал С.Баярцогт дээр тусч байгаа ч цаашид хэн холбогдохыг хэлж мэдэхгүй. Нэгнийгээ шархдчихаад байхад цөөвөр чоно шиг үйлдэл гаргадаг байдал бид үүсгэж болохгүй. Тийм учраас монголчууд энэ асуудалд ухаалаг хандаасай.