Засгийн газрын тэргүүн маань ууланд төөрч будлиад Монголын төр засаг тэр чигтээ хөдөлж байна. Эрлийн багийг Ерөнхийлөгч удирдаж, гүйцэтгэлийг нь Шадар сайд Д.Тэрбишдагва ахалж ёстой л надаас бусад нь анхаарч байх шиг байна. Харин би бол түүний ууланд авирсан зардал, түүнийг хайсан зардал мөнгө нь хэд болсон бол, татвар төлөгчдийн мөнгөнөөс хэдийг хийсгэж байгаа бол, энэ гарсан зардлаа буцааж төлөх болов уу л гэж татвар төлөгч шударга иргэдийнхээ өмнөөс бодож сууна.

Төрийн чухал ажлаар, тухайлбал зуд турхан болж хөл хүрэхгүй болсон Халх гол сумын иргэдээ эргэхээр яваад ийм байдалд орсон бол өөр хэрэг. Гэтэл энэ удаагийн эрсдэл бол түүний хувийн ажил байсан гэнэ. Ямартаа л өнөө өглөө түүний хэвлэл мэдээллийн албаны дарга энэ тухай огт мэдээлэлгүй байсан юм.

Ерөнхий сайд Н.Алтанхуягийг дагаж 70 орчим хүн явсан гэлээ. Ерөнхий сайдын багт орж "аялсан" эрхэмүүд Ланд 200-гаас доошгүй төмөр хүлгээр явсан байж таарна. Багаар бодоход 25 машин явсан болов уу гэж бодох юм. Хэнтий аймгийн Цэнхэр мандал сум Улаанбаатараас 200 км гэж бодохоор Бурхан халдун уул хүртэл бараг 270 км байгаа. Энэ бол багцаа л тоо гэдгийг санаарай. За тэгвэл орчин цагийн том машинуудын бензинд л гэхэд хамгийн багадаа гурван сая төгрөг зарцуулж "аялжээ". За яахав, дагалдаж явсан нөхөд нь өөрсдийнхөө мөнгөөр машиныхаа түлшийг хийсэн гэж бодсон ч Засгийн тэргүүн хүн бензин шатахуун хомс явна л гэж байхгүй. Ямар би Төв аймаг орчихоод ирэх гэж байгаа биш, бартаа ихтэй газар руу зүглэж байгаа болохоор хангалуун л явсан. За тэгээд ууланд авирхадаа идэж уух, өмсөж зүүхээс эхлээд зардал чамгүй байгаа нь ойлгомжтой.

"Аялагчдыг" аврах нисдэг тэргээр Бурхан халдун руу явахад хэдэн төгрөг шаардлагатай бол. Машин биш юм болохоор бензин тос, аврах хэрэгсэл гээд чамгүй мөнгө урссан нь ойлгомжтой. Зарим эх сурвалжийн мэдээллээр нисдэг тэрэг нэг цаг нисэхэд 5 сая 680 мянган төгрөгийг агаарт утаа болгон хийсгэдэг гэх. Тэгэхээр аврах ажиллагаа хэдэн цаг үргэлжилсэн, түүнээс шалтгаалаад татвар төлөгчдийн багагүй мөнгө агаарт замхарлаа. Дээрээс нь Онцгой байдлын аврагчид, төрийн тусгай ажилчид гээд бүх хүн түүнийг хайх ажилд оролцож байна. 

Ууланд төөрсөн 70 гаруй хүнийг нисдэг тэргээр хоёр гурван хэсэг болгон нийслэл рүү зөөж байгаа гээд бодохоор мөнгө урсаад л байна. Гэхдээ би хэд гэдгийг нь төсөөлж ч чадахгүй байна. Мэдээж хэдэн саяар л тоологдох байх. 

Шадар сайд, түүний мэдэлд байдаг Онцгой байдлын Ерөнхий газарт шаардлагатай хүнд хэцүү цаг үед зарцуулах эрсдэлийн сан гэж байдаг биз. Түүнээс мөнгө төгрөг гаргаж эрж хайж байх л даа. Харин тэр дансыг хэн бүрдүүлдэг юм бэ гэвэл татвар төлөгчид бид шүү дээ. 

Ерөнхий сайд Н.Алтанхуягийг эсэн мэнд эргэж ирэхээр нь Бурхан халдун ууланд авирсан, түүнийг хайхад хэдэн төгрөг зарцуулан гэдгийг асуумаар байна. Бүр задаргааг нь гаргуулж авмаар байна. Хэрэв дугаар хорооны Дондог, Дулмаа хэн ч бай энүүхэн урд Богд уулын нэг аманд ороод төөрчихсөн бол хэдэн ах дүүсээс нь өөр хүн хайхгүй дээ. Төр засаг бүр хөдлөхчгүй дээ. Өнгөрсөн жил Сэлэнгийн усанд үйсэн эх, хүүхэд хоёрыг хайх гэхэд яалаа даа.

Тиймээс Ерөнхий сайд Н.Алтанхуяг тэргүүтэй "аяллын баг"-ийнхан эрлийн ажилд зарцуулсан улсын төсвийн мөнгийг эр хүний жудаг заан буцааж төлнө гэдэгт итгэж байна.

Д.Галхүү