УИХ-ын дэд дарга С.Баярцогт өөрийнхөө холбогдолтой, тодруулбал Швейцарын банкинд дахь нэг сая ам.доллартай дансныхаа тухай өгүүлсэн хэвлэл мэдээллийн амыг хорьж эхэлжээ. Ийм байдалд орсон “Ийгл” телевизийн гадаад мэдээний редактор Х.Уламбаяр олон нийтийн мэдээллийн хэрэгслээр энэ тухайгаа цацсан байна. Тэрээр “УИХ-ын дэд дарга С.Баярцогтын нууц данстай холбогдуулан дан ганц С.Баярцогт ч бус Францын төсвийн сайд Жером Каюзак өнгөрсөн баасан гаригт өөрийн хүсэлтээрээ ажлаасаа чөлөөлөгдлөө. Харин нэг сая ам.долларын эзэн С.Баярцогт өөрийгөө бараг буруугүй, ямар хариуцлага хүлээлгэхийг УИХ шийднэ” гэхчлэн мэдэгдлээ гэсэн мэдээллийг Ийгл телевизийн гадаад мэдээний тоймоор онцолж.
Товчхондоо “...Францын төрийн өндөр албан тушаалтан одоогийн эрх барьж буй Францын "Социалист" намын лидерүүдийн нэг Жером Каюзак offshore буюу татваргүй бүсэд компани байгуулан түүний эхнэрийн нэр дээр 600,000 евро байсан нь илэрч Ерөнхий сайд Франсуа Олландын Засгийн газрыг бүхлээр нь чичиргээнд оруулсан.
Эдүгээ 60 настай Францын Төсвийн сайдын албыг хашдаг Жером Каюзак өнгөрсөн баасан гарагт өөрийн сайн дураараа огцорч, танхимаас гарч буйгаа зарласан бөгөөд Францын цагдаагийн газраас түүнийг "татвараас зайлсхийсэн, хөрөнгө орлогын мэдүүлгээ хуурамчаар бөглөсөн, нууцаар гадаадад их хэмжээний хөрөнгө оруулсан, орлогоо нуун дарагдуулсан" зэрэг олон шалтгаанаар эрүүгийн хэрэг үүсгэн цагдан хорьсон” гэсэн мэдээллийг цацаж Франц, Монголын хариуцлагын тогтолцоо ямар ялгаатай байгааг энэ мэдээллээрээ дамжуулан хүргэжээ.
Гэтэл Ийгл телевизийн захирал  “Улмаа чи С. Баярцогтын тухай мэдээ хийсэн үү? Тийм бол яг юу гэж ярьсан юм бэ? Ойрын үед тэр талаар мэдээ хийхгүй шүү” гэжээ.
Ингээд нэг сая ам.доллартай С.Баярцогт тэр мөнгөнөөсөө хэвлэл мэдээллийн хэрэгслийн амыг барихаар зэхэж энэ мэтээр шударга үнэний төлөө дуугарч байгаа нэгний аманд мөнгө “чихэж” байгаа бололтой.
Өнгөрсөн амралтын өдрөөр Берлинийг зорьсон УИХ-ын дэд дарга С.Баярцогт түргэн авч нууц дансан дахь мөнгөө зохицуулсан уу яасан ямартай ч өнөө өглөө 06.00 цагт эх орондоо ирээд байгаа юм.