Ерөнхийлөгчийн сонгууль ирэх зургадугаар сарын 26-нд болох тов гарлаа. Сонгуулийн тов гарангуут улс төрийн намууд хөдөлгөөнд орж эхэлдэг.
Ямар намтай эвсэх үү, хэнийг нэр дэвшүүлэх вэ гэх асуулт ар араасаа хөвөрнө. Парламентад сөрөг хүчин болоод буй МАН, угсаа гарал нэгтэй МАХН-тай эвсэн сонгуульд оролцоно гэх сураг ч дуулдах болсон. Энэ талаар МАХН-ын гишүүн УИХ-ын дэд дарга Л.Цогоос тодрууллаа.

-МАН, МАХН хоёр нэгдэнэ гэж ярьж байгаа. Энэ талаар нэгдсэн шийдэлд хүрсэн үү?
-Намууд нэгдэх тухай яриаг энэ удаа орхиё. Харин Ерөнхийлөгчийн сонгуульд хамтарч оролцох асуудал яригдаж байгаа. Үүнийг ялгаж салгаж ойлгох ёстой. Гэхдээ энэ асуудал эцсийн байдлаар шийдэгдээгүй. Ерөнхийлөгчийн сонгуулийн тухай хуульд намууд хамтарч оролцож болно гэсэн заалт бий. Хуульд заасан эрх нь нээлттэй байхад бид ийм сонголт яагаад хийж болохгүй гэж. Манай нам энэ сонгуульд оролцохоо илэрхийлсэн. Харин дангаараа оролцох уу, хамтрах уу гэдгийг хоёр талын ажлын хэсэг гарч судалж байна.

-Танай нам МҮАН-тай нэгдэж эвсэл байгуулсан. Хэрэв танайх МАН-тай хамтарч Ерөнхийлөгчийн сонгуульд оролцвол эвсэл задрах уу?
-МҮАН сонгуулийн нэг субьект. Бид хамтаараа явна. Манай эвсэл нэг суудалтай учир Ерөнхийлөгчийн сонгуульд өөр намтай хамтрах эсэхийг ярьж байна. Хэрэв МАН-тай хамтран оролцвол дундаасаа хэнийг сонгуульд нэр дэвшүүлэх эсэхээ ярилцана. Бид намынхаа их хурлыг хийгээд Ерөнхийлөгчийн сонгуульд миний бие, Сангийн сайд Ч.Улаан, Шадар сайд Д.Тэрбишдагва, Эрүүл мэндийн сайд С.Удвал, УИХ-ын гишүүн Ц.Цолмон нарыг дэвшүүлэх магадлалтай гэж гаргаж ирсэн. Одоо үүн дотроосоо дахин сонгон шалгаруулалт явуулна. Ерөнхийлөгчийн сонгуулийн тухай хуулийг хэдхэн хүнд зориулж хийсэн юм шиг харагдаж байгаа. Гэхдээ бид сөрөг хүчний хувьд дуу хоолойгоо хүргэнэ. Сонгуулийн сурталчилгааны хугацаа маш богинохон. Нэр дэвшигчид 35 хоногийн дотор бүх сонгогчтойгоо уулзаж чадах эсэх нь эргэлзээтэй л юм.